پشاور (ويب ڊيسڪ) خيبر پختونخوا جي وڏي وزير سهيل آفريدي چيو آهي ته باني پي ٽي آءِ عمران خان جي آزادي لاءِ “عمران خان رهائي فورس” قائم ڪئي پئي وڃي. هن ٻڌايو ته احتجاج ۽ ڳالهين جي ذميواري علامه ناصر عباس ۽ محمود خان اچڪزئي کي ڏني وئي آهي، جڏهن ته اسٽريٽ موومينٽ جي تياري به انهن جي حوالي ڪئي وئي آهي.
سپريم ڪورٽ ٻاهران ميڊيا سان ڳالهائيندي سهيل آفريدي چيو ته هن فورس ۾ پي ٽي آءِ، آءِ ايس ايف ۽ وومين ونگ سميت سڀئي طبقا شامل هوندا. عيد کان پوءِ پشاور ۾ حلف ورتو ويندو ۽ پوءِ ايندڙ لائحه عمل جو اعلان ڪيو ويندو.
ان موقعي تي علامه راجه ناصر عباس چيو ته باني پي ٽي آءِ جي اکين بابت ميڊيڪل رپورٽ سپريم ڪورٽ ۾ جمع ڪرائي وئي آهي، جنهن ۾ اکين جي حالت کي ڳڻتي جوڳي قرار ڏنو ويو آهي. هن الزام لڳايو ته جيلر طرفان مجرماڻي غفلت ڪئي وئي، جنهن خلاف عدالت سان رجوع ڪيو ويندو.
ناصر عباس وڌيڪ چيو ته تحريڪ تحفظ آئين پاڪستان پارليامينٽ ٻاهران ڌرڻو ان ڪري ڏنو ته حڪومت وڌيڪ لاپرواهي نه ڪري، پر پرامن احتجاج کي روڪڻ ۽ ايوانن جي ميمبرن کي گرفتار ڪرڻ سان گڏ دهشتگردي جا ڪيس داخل ڪرڻ غير آئيني ۽ قابلِ مذمت عمل آهي.
هن ٻڌايو ته عمران خان جي نظر کي نقصان پهچڻ تي محمود خان اچڪزئي طرفان بک هڙتال جي ڌمڪي ڏني وئي هئي، پر هاڻي اکين ۾ ڪجهه بهتري آئي آهي، تنهن هوندي به مسلسل نگراني ضروري آهي. ڊاڪٽر فيصل سلطان ۽ ڊاڪٽر عاصم يوسف کي رسائي ڏيڻ سان گڏ خاندان ۽ وڪيلن کي به آن بورڊ رکڻ گهرجي.
ناصر عباس چيو ته جڏهن وڪيل سلمان صفدر جي رپورٽ ۾ ٻڌايو ويو ته 80 سيڪڙو نظر متاثر ٿي آهي، تڏهن شديد پريشاني پيدا ٿي. علاج ۾ دير ڪرڻ مجرماڻو عمل هو. هاڻي ڪجهه بهتري ضرور آئي آهي پر اڃا به ابهم موجود آهي.
هن وڌيڪ چيو ته باني پي ٽي آءِ ڊاڪٽر فيصل سلطان سان ملاقات جو پيغام موڪليو آهي. رمضان المبارڪ جي آمد سبب ڌرڻو ختم ڪرڻ جو اعلان ڪيو ويو آهي، جڏهن ته ايندڙ لائحہ عمل جلد طئي ڪيو ويندو.
