اسلام آباد (ويب ڊيسڪ) اسلام آباد جي بينڪنگ ڪورٽ ۾ باني پي ٽي آءِ عمران خان ۽ ٻين خلاف فارن فنڊنگ ڪيس جي ٻڌڻي ٿي، جنهن ۾ اهم اڳڀرائي ٿي آهي۔ عدالت جوابدارن خلاف مڪمل چالان 5 مارچ تائين جمع ڪرائڻ جو حڪم ڏنو آهي۔
ڪيس جي ٻڌڻي دوران پاڪستان تحريڪ انصاف جو سي ايف او سراج احمد ۽ نجي بئنڪ جو ملازم فيصل قاضي به جانچ ۾ شامل ٿي ويا۔ ايف آءِ اي عدالت کي ٻڌايو ته ٻن نون جوابدارن جي شموليت کان پوءِ جزوي چالان بدران مڪمل چالان تيار ڪيو ويندو۔
اسپيشل پراسيڪيوٽر واثق ملڪ عدالت کي آگاهه ڪيو ته اڳ ۾ جزوي چالان جمع ٿي چڪو آهي، پر هاڻي نون جوابدارن جي شموليت کان پوءِ مڪمل چالان پيش ڪيو ويندو۔ جج عبدالغفور ڪاڪڙ طرفان سوال ڪيو ويو ته چالان مڪمل ڪرڻ لاءِ ڪيتري مهلت گهرجي؟ جنهن تي پراسيڪيوٽر چيو ته 10 کان 15 ڏينهن ۾ مڪمل چالان پيش ڪري سگهجي ٿو۔
عدالت بعد ۾ حڪم ڏنو ته 5 مارچ تائين مڪمل چالان جمع ڪرايو وڃي ۽ جوابدار سراج احمد ۽ فيصل قاضي جي عبوري ضمانت به ساڳئي تاريخ تائين منظور ڪئي وئي۔ ڪيس جي ٻڌڻي 5 مارچ تائين ملتوي ڪئي وئي۔
