ڪراچي: ايران-امريڪا جنگ جي پس منظر ۾ پاڪستان جي عالمي ايئرپورٽن تان اڄ به 122 پروازون ملتوي ٿي ويون.
تفصيل موجب ڪراچي ايئرپورٽ تان دبئي، ابوظهبي، قطر، شارجه، ڪويت ۽ بحرين لاءِ 38 اڏامون، اسلام آباد ايئرپورٽ تان 30 اُڏامون، جڏهن ته لاهور ايئرپورٽ تان 20 اُڏامون ملتوي ٿيون.
پشاور تان 10، ملتان تان 10، سيالڪوٽ تان 10 ۽ فيصل آباد تان 4 اُڏامون ملتوي ٿيون۔ انهن اڏامن ۾ ايمريٽس، اتحاد، ايئر عربيا، پي آءِ اي، ايئر بلو، فلائي دبئي ۽ قطر ايئر سميت ٻين ملڪي ۽ غيرملڪي ايئرلائنز شامل هيون.
گذريل 8 ڏينهن دوران پاڪستان مان وچ اوڀر جي ملڪن لاءِ ملتوي ٿيل اڏامن جو انگ 936 تائين پهچي ويو آهي. 28 فيبروري کان يو اي اي، قطر، بحرين، ڪويت ۽ ايران جي هوائي حدون بند ٿيڻ سبب اُڏامون متاثر ٿي رهيون آهن.
ٻئي طرف ڪراچي ۽ لاهور ايئرپورٽن تي گذريل ٽن ڏينهن دوران امارات ايئر ۽ فلائي دبئي جون 4 رليف اُڏامون لٿيون، جن ذريعي متحده عرب امارات ۾ ڦاٿل پاڪستاني وطن واپس آيا.
