ڪراچي (ويب ڊيسڪ) عليمه خان اڳڪٿي ڪئي آهي ته عمران خان کي هاڻي ڪهڙي ڪيس ۾ سزا ڏني ويندي.
پاڪستان تحريڪ انصاف جي باني چيئرمين عمران خان جي ڀيڻ عليمه خان دعويٰ ڪئي آهي ته اڳوڻي وزيراعظم کي ٻئي ڪيس ۾ سزا ڏيڻ جون تياريون ٿي رهيون آهن.
اڊيالا جيل ٻاهران ميڊيا سان ڳالهائيندي، عليمه خان چيو ته جيل اندر توشه خانه II ڪيس جي ڪارروائي غير معمولي تڪڙ سان ڪئي پئي وڃي ۽ اهو سڀ ڪجهه انهي مقصد کي ذهن ۾ رکندي ڪيو پيو وڃي.
عليمه خان وڌيڪ چيو ته عمران خان پاڻ چڱي طرح ڄاڻي ٿو ته فيصلو سندس خلاف ايندو ۽ کيس ٻيهر سزا ڏني ويندي. موجوده حالتن ۾ انصاف جي ڪا اميد ناهي.
ميڊيا جي نمائندن سان سڌو ڳالهائڻ کان انڪار ڪندي هن چيو ته هوءَ مين اسٽريم ميڊيا جي سامهون نه ڳالهائيندي ڇاڪاڻ ته “پلانٽ ٿيل ماڻهو” اتي موڪليا پيا وڃن جيڪي بدتميزي ڪن ٿا ۽ ماحول خراب ڪرڻ جي ڪوشش ڪن ٿا. اهڙا منظر ڪارڪنن کي ناراض ڪن ٿا ۽ پوءِ وڌيڪ گرفتاريون ڪيون وڃن ٿيون.
پي ٽي آءِ جي باني جي ڀيڻ اها به دعويٰ ڪئي ته دٻاءُ وڌائڻ لاءِ سندس ۽ پي ٽي آءِ جي ڪارڪنن خلاف نوان ڪيس داخل ڪيا پيا وڃن.
هن چيو ته گذريل 2 سالن کان ميڊيا اڊيالا جيل جي ٻاهران ڪوريج ڪري رهي آهي ۽ ڪڏهن به ڪا بدسلوڪي نه ٿي آهي، پر هاڻي صورتحال کي خراب ڪرڻ لاءِ ڄاڻي واڻي قدم کنيا پيا وڃن.
