اسلام آباد (ويب ڊيسڪ) اسلام آباد ۾ هڪ ٽي وي پروگرام دوران سينيٽر فيصل واوڊا چيو ته اڳوڻو ڊي جي آءِ ايس آءِ فيض حميد، جنهن کي فوجي عدالت 14 سال قيد ۽ پورهئي جي سزا ٻڌائي آهي، هاڻي ثبوتن سميت عمران خان خلاف بيان ڏيڻ وڃي رهيو آهي. واوڍا موجب هي رڳو شروعات آهي ۽ معاملو هتي بيهڻ وارو ناهي.
هن چيو ته کيس 9 مئي کان هڪ سال اڳ ئي پارٽي مان ڪڍيو ويو هو ۽ هو اڳ ئي خبردار ڪري رهيو هو ته اهڙي رستي تي نه وڃو جتان واپسي ممڪن نه هجي. سندس چوڻ مطابق رياست، ادارن ۽ ملڪ جي مفادن خلاف عملن تي سخت سزائون ملنديون آهن.
واوڊا جو دعويٰ هو ته فيض حميد ٻڌائيندو ته عمران خان کي وزيراعظم طور ڪهڙا حڪم ملندا رهيا، خاص طور تي 9 مئي جي حوالي سان. هن وڌيڪ چيو ته جيڪي پي ٽي آءِ جا اڳواڻ ان وقت ملوث هئا، چاھي هاڻي پاسي ٿي ويا هجن يا جيل ۾ هجن، سڀني کي ڪٽهڙي ۾ آندو ويندو. سندس مطابق هي عمل رڪجڻ وارو ناهي، پر شروعات آهي.
سينيٽر فيصل واوڊا، فيض حميد کي سزا تي ردعمل ڏيندي چيو آهي ته 9 مئي جا ڪيس باقي آهن ۽ جنهن سياسي پارٽي اهو ڪيو، ان جو فيصلو ڀت تي نظر اچي رهيو آهي، اهو انصاف جو ڊگهو سلسلو آهي، جيڪو نه بيهندو.
پنهنجي بيان ۾ فيصل واوڊا چيو ته منهنجي اها ڳالهه به ٺيڪ ثابت ٿي ته فيض حميد کي 14 سال قيد جي سزا ٻڌائي وئي، ڦاهي جي سزا نه ٿي.
هن چيو اڃا ته 9 مئي ڪيسن جو فيصلو ايندو، جنهن ۾ انهن تباهي مچائي، رياست، سياست، عدليا ۽ جمهوريت کي نقصان پهچايو، ميڊيا تي قبضي جي ڪوشش ڪئي، فيصلي سان واضح ڪيو ويو آهي ته پاڪستان کان وڏو ڪنهن جو به پيءُ ناهي، سزا ۽ جزا جو بنياد رکيو ويو آهي.
سندس چوڻ هو ته 9 مئي جو ٽرائل اڃا هلي رهيو آهي، جنهن جي گهٽ ۾ گهٽ سزا 14 سال آهي، جيڪا سياسي جماعت انهن ڪيسن ۾ ملوث هئي، جيڪا ڊرامي بازي پي ٽي آءِ ۽ ان جي باني ڪئي، ظلم سان ماڻهن کي مارايو ويو، پنهنجي ئي اداري، شهيدن ۽ يادگارن کي نقصان پهچايو ويو، مان انهن کي ان ئي شئي کان روڪي رهيو هيس، ٻڌايو هو ته سندن واپسي ناهي.
