اسلام آباد (ويب ڊيسڪ) اسلام آباد هاءِ ڪورٽ جي چيف جسٽس سرفراز ڊوگر ۽ ايمان مزاري ايڊووڪيٽ جي وچ ۾ تلخ ڪلامي جي معاملي ۾ ايمان مزاري چيف جسٽس سرفراز ڊوگر خلاف هراساني ڪميٽي ۾ شڪايت داخل ڪرائي ڇڏي آهي.
جسٽس ثمن رفعت امتياز اسلام آباد هاءِ ڪورٽ جي عورتن جي هراساني جي جاچ ڪميٽي جي سربراهي ڪري رهي آهي. ذريعن جو چوڻ آهي ته جسٽس ثمن رفعت امتياز جي عدالتي ساٿي کي چيف جسٽس خلاف شڪايت ملي آهي.
شڪايت ۾ چيو ويو آهي ته چيف جسٽس سرفراز ڊوگر خلاف عورتن جي هراساني کان تحفظ واري ايڪٽ تحت جاچ ڪئي وڃي، اهو طئي ڪيو وڃي ته چيف جسٽس ايمان مزاري بابت جنسي ۽ ڌمڪيون ڏيندڙ تبصرا ڪيا ۽ چيف جسٽس سرفراز ڊوگر کي شڪايت ڪندڙ کي هراسان ڪرڻ جو مجرم قرار ڏنو وڃي.
ايمان مزاري شڪايت ۾ وڌيڪ چيو آهي ته چيف جسٽس سرفراز ڊوگر خلاف هراساني جو معاملو مجاز اختيار سپريم جوڊيشل ڪائونسل ڏانهن موڪليو وڃي.
