اسلام آباد: 190 ملين پائونڊ ڪيس ۾ عمران خان ۽ بشريٰ بي بي جي سزا معطلي جون درخواستون ٻڌڻي لاءِ مقرر ڪيون ويون آهن.
190 ملين پائونڊ ڪيس جي حوالي سان اسلام آباد هاءِ ڪورٽ ۾ هڪ اهم پيش رفت سامهون آئي آهي، جنهن مطابق اڳوڻي وزيراعظم ۽ پي ٽي آءِ جي باني چيئرمين عمران خان ۽ سندس زال بشريٰ بي بي جي سزا معطلي جون درخواستون ٻڌڻي لاءِ مقرر ڪيون ويون آهن.
عدالت سزا معطلي جون درخواستون 25 سيپٽمبر تي ٻڌڻي لاءِ مقرر ڪيون آهن، جن تي چيف جسٽس اسلام آباد هاءِ ڪورٽ جسٽس سرفراز ڊوگر ۽ جسٽس اعظم خان ٻڌڻي ڪندا.
ياد رهي ته عمران خان ۽ بشريٰ بي بي جي سزا معطلي جي درخواستن تي آخري ٻڌڻي 26 جون تي ٿي هئي ۽ احتساب عدالت باني پي ٽي آءِ ۽ بشريٰ بي بي کي 17 جنوري تي سزا ٻڌائي هئي. ياد رهي ته ٻه رڪني بينچ ڪيس جلد شيڊول ڪرڻ جي هدايت ڪئي هئي، جڏهن ته پي ٽي آءِ باني ۽ سندس زال بشريٰ بي بي جي سزا معطلي جي درخواست اڃا تائين شيڊول نه ٿي هئي، جنهن تي عمران خان جي ڀيڻ عليمه خان ڪيس جي جلد ٻڌڻي لاءِ اڄ چيف جسٽس جي چيمبر ۾ پهتي. ان موقعي تي نياز الله نيازي، نعيم حيدر پنجوٿا ۽ خالد يوسف چوڌري به هاءِ ڪورٽ ۾ موجود هئا، جڏهن ته انتظار حسين پنجوٿا ۽ علي بخاري ايڊووڪيٽ پڻ عدالت ۾ پهتا.
