راولپنڊي (ويب ڊيسڪ) راولپنڊي جي اڊياله جيل ۾ خيبرپختونخوا جي وزيراعليٰ علي امين گنڊاپور جي پاڪستان تحريڪ انصاف جي باني عمران خان سان ملاقات ڪرائي وئي.
وزيراعليٰ علي امين گنڊاپور اڊياله جيل پهتو، جتي جيل جي ڪانفرنس روم ۾ عمران خان سان ملاقات ٿي. ملاقات ٻن ڪلاڪن کان وڌيڪ وقت تائين جاري رهي. ملاقات کان پوءِ علي امين گنڊاپور جيل مان واپس روانو ٿي ويو.
ٻئي طرف اسلام آباد جي ڊسٽرڪٽ اينڊ سيشن ڪورٽ، علي امين گنڊاپور جي وڪيل جي پيش ٿيڻ تي، آڊيو ليڪ ڪيس ۾ جاري ناقابل ضمانت گرفتاري وارنٽ منسوخ ڪري ڇڏيا.
ايڊيشنل ڊسٽرڪٽ اينڊ سيشن جج نصر من الله ڪيس جي ٻڌڻي ڪئي. علي امين گنڊاپور جي وڪيل راجا ظهور الحسن عدالت کي آگاهه ڪيو ته پشاور هاءِ ڪورٽ طرفان 3 هفتن لاءِ ڪنهن به مقدمي ۾ گرفتاري کان روڪ ڏني وئي آهي.
جج چيو ته درخواست ڏيو، مان ڏسندس. وڪيل طرفان وارنٽ منسوخي جي درخواست داخل ڪئي وئي، جيڪا عدالت منظور ڪري ورتي.
