ڪوئٽه(ويب ڊيسڪ) بلوچستان جي راڄڌاني ڪوئٽه جي ماڊل ٽائون واري علائقي خوجڪ روڊ تي ايف سي هيڊڪوارٽر جي مرڪزي دروازي تي خودڪش ڌماڪو ٿيو، جنهن جي نتيجي ۾ 10 بيگناهه شهري شهيد ۽ 30 کان وڌيڪ ماڻهو زخمي ٿي پيا، جن ۾ 2 سيڪيورٽي اهلڪار ۽ 4 عورتون شامل آهن۔
ڌماڪي جي شدت ايتري هئي جو ويجهي عمارتن جا شيشا ٽٽي پيا ۽ بيهندڙ گاڏين کي سخت نقصان پهتو۔ سيڪيورٽي فورسز فوري ڪارروائي ڪندي حملو ڪندڙن جي سازش ناڪام بڻائي ڇڏي، جڏهن ته خودڪش بمبار سميت 6 دهشتگرد مارجي ويا۔ ڌماڪي کان پوءِ فائرنگ جي آواز سان علائقي ۾ خوف ۽ ڏهڪاءُ پکڙجي ويو۔
سيڪيورٽي ذريعن موجب، حملو ڪندڙ بارود سان ڀريل گاڏي ايف سي هيڊڪوارٽر جي دروازي سان ٽڪرائي، جنهن سبب سوين فٽ پري تائين نقصان ٿيو۔ ابتدائي جاچ مان ظاهر ٿيو آهي ته هي حملو بلوچستان ۾ جاري دهشتگردي جي سلسلي جو حصو هو، پر فورسز جي بروقت ردعمل سان هيڊڪوارٽر ۾ داخل ٿيڻ جي ڪوشش ناڪام بڻائي وئي۔
صوبائي وزيرِ صحت بخت محمد ڪاڪڙ سول اسپتال ڪوئٽه مان تصديق ڪندي ٻڌايو ته شهيدن ۾ 4 عورتون شامل آهن، جڏهن ته زخمين مان ڪيترن جي حالت ڳڻتي جوڳي آهي ۽ انهن کي آءِ سي يو ۾ منتقل ڪيو ويو آهي۔
وفاقي وزيـر داخلا محسن نقوي ايف سي جي جوانن جي بهادري جي واکاڻ ڪندي چيو ته انهن فتنۃ الہندوستان جي 6 دهشتگردن کي عبرتناڪ انجام تائين پهچايو، جن ۾ خودڪش بمبار به شامل هو۔ هن زخمي جوانن جي جلد صحتيابي لاءِ دعا پڻ ڪئي۔
وزيرِاعليٰ بلوچستان مير سرفراز بگٽي واقعي جي مذمت ڪندي چيو ته دهشتگردن جي بزدلانه ڪارروائي جو مقصد امن خراب ڪرڻ هو، پر سيڪيورٽي فورسز جي موثر ڪارروائي سان انهن کي فوري طور واصلِ جهنم ڪيو ويو۔ هن شهيدن جي وارثن سان همدردي جو اظهار ڪندي اعلان ڪيو ته زخمين جي علاج جو خرچ صوبائي حڪومت برداشت ڪندي۔
واقعي کان پوءِ ڪوئٽه شهر ۾ سيڪيورٽي سخت ڪئي وئي آهي، ايف سي ۽ پوليس علائقي جي ناڪابندي ڪري ڇڏي آهي، جڏهن ته بم ڊسپوزل اسڪواڊز کي الرٽ ڪيو ويو آهي۔ ترجمان ايف سي موجب هيڊڪوارٽر جي ديوارون ۽ گيٽ متاثر ٿيا آهن، پر اندروني تنصيبات محفوظ آهن۔
سيڪيورٽي ادارن جو چوڻ آهي ته حملو ڪندڙن جي سڃاڻپ ۽ محرڪات جي جاچ جاري آهي، ۽ امڪان آهي ته هي حملو مقامي دهشتگرد گروپن سان لاڳاپيل هجي.
