پشاور(ويب ڊيسڪ) پشاور ۾ ايف سي هيڊڪوارٽر تي ٿيل خودڪش حملو ناڪام بڻايو ويو، جنهن ۾ ٽيئي دهشتگرد مارجي ويا، جڏهن ته ايف سي جا 3 جوان شهيد ۽ ڪيترائي زخمي ٿيا.
شروعاتي جاچ موجب دهشتگردن جو اصل هدف هيڊڪوارٽر ۾ جاري پريڊ هئي، جتي ان وقت لڳ ڀڳ 450 اهلڪار موجود هئا. رپورٽن مطابق پهريون خودڪش بمبار صبح 8:11 تي صدر واري پاسي کان پيادل اچي گيٽ تي ڌماڪو ڪيو، پر هيڊڪوارٽر ۾ سخت سيڪيورٽي ۽ بيئرير هجڻ سبب اڳتي وڌي نه سگهيو.
جاچ ۾ وڌيڪ ڄاڻايو ويو آهي ته ڌماڪي کان پوءِ ٻيا ٻه دهشتگرد اندر گهڙڻ جي ڪوشش ڪئي، پر گيٽ تي ئي فورسز جي سخت مزاحمت کي منهن ڏيڻو پيو. ایف سي جي جوانن بهادري سان مقابلو ڪندي ٻنهي دهشتگردن کي ماريو ۽ حملو ناڪام بڻايو.
ذريعن موجب ٽيئي دهشتگرد پيادل آيا هئا ۽ سڀني وٽ خودڪش جئڪٽون هيون. حملو باقاعده منصوبه بندي سان ڪيو ويو هو ۽ دهشتگردن جو اصل ٽارگٽ پريڊ ۾ موجود اهلڪار هئا.
