لاهور (ويب ڊيسڪ) پنجاب جي اطلاعات واري وزير عظميٰ بخاري، سنڌ حڪومت جي ڪارڪردگي تي سخت تنقيد ڪندي پاڪستان پيپلز پارٽي جي اڳواڻ شرميلا فاروقي کي مناظري جو چئلينج ڏئي ڇڏيو آهي۔ هن چيو ته “سندھ ۾ اهڙي ترقي ٿي رهي آهي جيڪا نظر ئي نٿي اچي، جيڪڏهن شوق آهي ته اچو، مناظرو ڪريون۔”
عظميٰ بخاري چيو ته پيپلز پارٽي گذريل 17 سالن کان سنڌ ۾ اقتدار ۾ آهي، جڏهن ته مريم نواز جي پنجاب حڪومت کي اڃا ٻه سال به مڪمل نه ٿيا آهن۔ “توهان 17 سالن ۾ 17 عوامي فلاح جا منصوبا به نه ڳڻي سگهو، جڏهن ته مريم نواز صرف 18 مهينن ۾ 90 منصوبا شروع ڪيا، جن مان 50 مڪمل ٿي چڪا آهن،” هن دعويٰ ڪئي۔
وزير اطلاعات پنجاب وڌيڪ چيو ته “پنهنجي ڇت پنهنجو گهر” پروگرام تحت 90 هزار گهر فراهم ڪيا ويا، 80 هزار اسڪالرشپ ڏنيون ويون، ساڍا 9 هزار ٽريڪٽر ۽ 27 هزار اليڪٽرڪ بائيڪون ورهايون ويون۔ ان سان گڏ، ذهين شاگردن کي جديد ليپ ٽاپ، هزار بيڊ وارو ڪينسر اسپتال، مفت دوائون، اليڪٽرڪ بسون ۽ ڪارڊيالاجي اسپتالون به پنجاب ۾ شروع ڪيون ويون آهن۔
عظميٰ بخاري چيو ته هو شرميلا فاروقي سان مناظري لاءِ مڪمل تيار آهي، ۽ جيڪڏهن سنڌ حڪومت کي پنجاب سان مقابلي جو شوق آهي ته اچن ۽ عوام آڏو پنهنجون ڪارڪردگيون پيش ڪن۔ “ڪراچي جا ماڻهو پاڻ لاهور جي صفائي ۽ روڊن جي واکاڻ ڪن ٿا، جيڪو شرميلا فاروقي کي تڪليف ڏئي ٿو،” هن وڌيڪ چيو۔
بي آءِ ايس پي جي حوالي سان عظميٰ بخاري چيو ته مريم نواز پنجاب جي ٻوڏ متاثرن کي 10 لک رپيا امدادي چيڪ ڏئي رهي آهي، جڏهن ته سنڌ ۾ بي آءِ ايس پي تحت صرف 10 هزار رپيا ڏنا پيا وڃن، جنهن تي پنجاب کي ڪو اعتراض ناهي.
