لاهور (ويب ڊيسڪ) پنجاب جي اطلاعات واري وزير عظميٰ بخاري پيپلز پارٽي تي تنقيد ڪندي چيو آهي ته جيڪڏھن بلاول ڀٽو کير ۽ ماکيءَ جون نديون وهائڻ چاهي ٿو ته پوءِ اهو سنڌ ۾ وهائي جتي هن وٽ مينڊيٽ موجود آهي.
پيپلز پارٽي جي اڳواڻ شازيه مري جي بيان تي ردعمل ڏيندي عظميٰ بخاري چيو ته عقل ڪُل بڻجڻ جي ڪوشش نه ڪريو، ڊڪٽيشن به اوهان ڏئي رهيا آهيو، ڌمڪيون به اوهان ڏئي رهيا آهيو، جتي اوهان جو مينڊيٽ ناهي، اتي زوريءَ سان ڏيڊ گز جي مسجد ٺاهڻ جي ڪوشش نه ڪريو.
عظميٰ بخاري چيو ته بلاول ڀٽو، جيڪو کير ۽ ماکيءَ جون نهرون وهائڻ چاهي ٿو، ته پوءِ اهي سنڌ ۾ وهائي جتي هن وٽ عوامي مينڊيٽ آهي. پنجاب جي عوام مريم نواز کي مينڊيٽ ڏنو آهي، ۽ مريم نواز کي خبر آهي ته پنهنجي ماڻهن جا مسئلا ڪيئن حل ڪرڻا آهن، ۽ هوءَ انهن کي حل به ڪري رهي آهي.
هن وڌيڪ چيو ته پنجاب حڪومت بي آءِ ايس پي تحت 12، 12 هزار رپيا ورهائي نٿي سگهي، اهڙا لالي پاپ اوهان سنڌ جي عوام کي ڏيو، بي بي! 2022 مان ٻاهر نڪرو، هي 2025 آهي.
