لاڙڪاڻو (بيورو) گڙهي خدا بخش ۾ شهيد بينظير ڀٽو جي 18هين برسي جي موقعي تي وڏي جلسي کي خطاب ڪندي پاڪستان پيپلزپارٽي جو چيئرمين بلاول ڀٽو زرداري چيو ته مئي ۾ جنگي ميدان ۾ ٿيل هار کي ڀارت اڃا تائين هضم نه ڪري سگهيو آهي، هاڻي ته مودي اسان جي فيلڊ مارشل جو نالو ٻڌي ئي لڪي وڃي ٿو.
بلاول ڀٽو چيو ته هڪ سال جي وڏي ڪاميابي اها آهي جو فوج ۽ قوم گڏجي ڀارت کي جنگ ۾ شڪست ڏني، جيڪا پوري پاڪستان جي فتح هئي ۽ ان کانپوءِ دنيا ۾ پاڪستان کي قبوليت ملي. هن وڌيڪ چيو ته گڙهي خدا بخش جي قربانين کانسواءِ اها ڪاميابي ممڪن نه هئي، ڇو ته انهن قربانين جي نتيجي ۾ پاڪستان ايٽمي قوت بڻيو.
پي پي چيئرمين چيو ته بينظير ڀٽو جي ڪوششن سان ملڪ کي ميزائل ٽيڪنالوجي ملي، جنهن سان دفاع ممڪن ٿيو، جڏهن ته صدر زرداري چين کان اهي جهاز گهرايا جن ڀارت جا ڇهه جهاز گرائي ڪاميابي حاصل ڪئي.
بلاول ڀٽو وڌيڪ چيو ته پاڪ-چين دوستي جي بنياد قائد عوام رکيو، بينظير ان کي اڳتي وڌايو ۽ زرداري سي پيڪ جي بنياد رکي. هن چيو ته ڀارت پنهنجي شڪست کي اڃا تائين قبول نه ڪري سگهيو آهي، فيلڊ مارشل جو نالو ٻڌي مودي لڪي وڃي ٿو ۽ هاڻي عالمي فورمز تي به نه ٿو وڃي، جڏهن ته ماضي ۾ هو اتي وڃي پاڪستان کي بدنام ڪندو هو. بلاول موجب اها پاڪستاني فوج ۽ عوام جي وڏي ڪاميابي آهي.
