ڪراچي(اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري چيو آهي ته جيڪڏهن وفاق سنڌ کي جنرل سيلز ٽيڪس (جي ايس ٽي) گڏ ڪرڻ جي ذميواري ڏئي ته صوبو مقرر هدف کان وڌيڪ ٽيڪس گڏ ڪري سگهي ٿو، جنهن سان وفاقي مالي بحران گهٽجي سگهي ٿو.
ڪراچي ۾ اين آئي سي وي ڊي ۾ جديد او پي ڊي بلاڪ جي افتتاحي تقريب کي خطاب ڪندي بلاول ڀٽو چيو ته اين آئي سي وي ڊي جي ٽيم عالمي معيار جو مفت علاج جاري رکي دنيا ۾ پاڪستان جو نالو روشن ڪيو آهي. هن چيو ته ارڙهين ترميم ۽ مالي وسيلن بابت اعتراض ڪندڙن کي صوبائي ادارن جون ڪاميابيون نظر نٿيون اچن.
بلاول ڀٽو چيو ته پيپلزپارٽي پنهنجي منشور موجب سنڌ جي عوام کي جديد ۽ مفت علاج سندن گهر جي در تي فراهم ڪري رهي آهي. هن چيو ته وفاقي حڪومت جا ڪجهه وزير بحران کي بنياد بڻائي صوبن جا اختيار واپس وٺڻ چاهين ٿا، جڏهن ته موجوده حالتن ۾ گڏجي ڪم ڪرڻ جي ضرورت آهي.
هن چيو ته سروسز سيلز ٽيڪس پهريان ايف بي آر گڏ ڪندو هو، پر اٺارهين ترميم کان پوءِ صوبن جي ذميواري بڻيو، ۽ سنڌ، بلوچستان ۽ خيبرپختونخوا ايف بي آر جا سڀ رڪارڊ ٽوڙي ڇڏيا. بلاول ڀٽو چيو ته جيڪڏهن وفاق سنڌ کي جي ايس ٽي گڏ ڪرڻ جو هدف ڏئي ته صوبو نه رڳو هدف پورو ڪندو پر اضافي رقم به وفاق حوالي ڪندو.
هن چيو ته جيڪڏهن هدف کان وڌيڪ ٽيڪس گڏ ڪيو ويو ته اضافي رقم سنڌ جي عوام جي بهتري تي خرچ ڪئي ويندي. بلاول ڀٽو چيو ته جيڪڏهن بحران آهي ته ان جو مطلب آهي ته وفاقي ادارا پنهنجو ڪردار صحيح نموني ادا نه ڪري سگهيا، جڏهن ته صوبن پنهنجي ذميواري نڀائي آهي.
بلاول ڀٽو چيو ته پيپلزپارٽي پنهنجي منشور تي عمل ڪندي سنڌ جي عوام کي مفت ۽ معياري علاج فراهم ڪري رهي آهي، ۽ اين آئي سي وي ڊي دنيا جو سڀ کان وڏو مفت دل جو علاج ڪندڙ نيٽ ورڪ بڻجي چڪو آهي. هن چيو ته پبلڪ پرائيويٽ پارٽنرشپ ذريعي سنڌ حڪومت ڪيترن ئي شعبن ۾ ڪاميابيون حاصل ڪيون آهن، جيڪي ٻين صوبن لاءِ به مثال بڻجي سگهن ٿيون.
