لاهور(ويب ڊيسڪ) پنجاب جي اطلاعات واري وزير عظميٰ بخاري چيو آهي ته جن ماڻهن کي چندو ۽ امداد کائڻ جي عادت پئجي وئي هجي، اهي ٻين کي به نصيحتون ڏيڻ لڳن ٿا.
مزمل اسلم جي بيان تي سخت ردعمل ڏيندي عظميٰ بخاري چيو ته هر ڪو پنجاب تي آڱر کڻڻ اچي ٿو، پر پنهنجي صوبن جي حالت ڏسڻ گهرجي. خيبرپختونخوا ۾ دهشتگردي، ڪرپشن، بي قانوني ۽ خراب حڪمراني روز در تي دستڪ ڏئي رهي آهي، پر اتي جي حڪومت خاموش آهي.
هن سوال ڪيو ته بونير، صوابي ۽ سوات ۾ ٻوڏ سبب هزارين ماڻهو متاثر ٿيا، ڇا خيبرپختونخوا حڪومت انهن کي امداد فراهم ڪئي؟ توهان جا وزيراعليٰ هر مهيني وفاق کان فنڊز لاءِ خط لکن ٿا، ۽ هتي چلي مرچ وانگر بيان بکي رهيا آهن. خيبرپختونخوا جي ٻن وزيرن وزيراعليٰ جي ڪرپشن بابت بيان ڏئي استعيفا ڏني.
عظميٰ بخاري ٻڌايو ته پنجاب جي 27 ضلعن ۾ 1857 ٽيمون ٻوڏ متاثرن جي سروي ۾ مصروف آهن، جيڪي متاثر ماڻهن، آبادين، فصلن ۽ مال مويشيءَ جو جائزو وٺي رهيون آهن. پنجاب ۾ ٻوڏ سبب 45 لک ماڻهو متاثر ٿيا آهن، ۽ هڪ مهيني اندر سروي مڪمل ڪئي ويندي.
هن وڌيڪ چيو ته پنجاب جي وزيراعليٰ مريم نواز ٻوڏ متاثرن جي نالي تي قرض يا امداد نه گهرندي، هوءَ پاڻ متاثر ماڻهن وٽ وڃي مدد ڪندي، ڪنهن جي سامهون هٿ نه ڦهلائيندي. سندن مقصد عوامي خدمت آهي، نه ته امداد يا چندو وٺڻ.
