واشنگٽن (ويب ڊيسڪ) – پاڪستان جي ناڻي واري وفاقي وزير سينيٽر محمد اورنگزيب پنهنجي امريڪا جي تازي دوري دوران سعودي عرب جي وزير خزانه محمد عبدالله عبدالعزيز الجدعان سان اهم ملاقات ڪئي، جنهن ۾ ٻنهي ملڪن جي وچ ۾ واپاري ۽ اقتصادي لاڳاپن، سيڙپڪاري ۽ نجيڪاري جي معاملن تي تفصيلي ڳالهيون ٿيون.
ملاقات دوران سينيٽر اورنگزيب سعودي هم منصب کي پاڪستان ۾ جاري نجيڪاري پروگرام بابت آگاهه ڪيو، خاص طور تي قومي ايئر لائن (PIA) ۽ هوائي اڏن جي نجيڪاري جي حوالي سان ٿيندڙ اڳڀرائي تي روشني وڌي.
ناڻي واري وزير پاڪستان ۾ نجي شعبي جي سيڙپڪاري جي واڌاري تي زور ڏنو ۽ ان سلسلي ۾ انٽرنيشنل فنانس ڪارپوريشن (IFC) ۽ ملٽي ليٽرل انويسٽمينٽ گارنٽي ايجنسي (MIGA) جي اهم ڪردار تي به خيالن جي ڏي وٺ ڪئي.
ان موقعي تي محمد اورنگزيب پاڪستان جي انفراسٽرڪچر منصوبن لاءِ سعودي مالي سهڪار ۽ تعاون جي خواهش جو اظهار ڪيو، جنهن تي سعودي وزير خزانه مثبت ردعمل ڏنو.
سينيٽر اورنگزيب سعودي هم منصب کي يقين ڏياريو ته پاڪستان آءِ ايم ايف پروگرام تحت جاري سڌارن جي ايجنڊا تي ثابت قدمي سان عمل ڪري رهيو آهي ۽ معيشت کي پائيدار بنيادن تي مستحڪم ڪرڻ لاءِ حڪومت سنجيده قدم کڻي رهي آهي.
ملاقات جي آخر ۾ ٻنهي ملڪن جي وزرائن اس ڳالهه تي اتفاق ڪيو ته پاڪستان ۽ سعودي عرب جا لاڳاپا صرف روايتي دوستي تائين محدود ناهن، پر انهن جي وچ ۾ اسٽريٽيجڪ اقتصادي ڀائيواري جا وسيع امڪان موجود آهن، جن کي وڌيڪ هٿي ڏني ويندي.
