اسلام آباد (ويب ڊيسڪ) قومي ايئرلائن پاڪستان انٽرنيشنل ايئرلائن (پي آءِ اي) جو فلائيٽ آپريشن جزوي طور تي بحال ٿي ويو آهي. انتظاميه متبادل انتظامن تحت اُڏامون روانيون ڪرڻ شروع ڪري ڇڏيون آهن.
اسلام آباد کان دمام ويندڙ پي ڪي 245 ۽ اسلام آباد کان جدہ ويندڙ پي ڪي 761 اُڏامون روانو ٿي چڪيون آهن، جڏهن ته ٻين متاثر ٿيل اُڏامن لاءِ به ٽيڪ آف ڪليئرنس جلد فراهم ڪئي پئي وڃي.
انتظاميه واضح ڪيو آهي ته ايئرپورٽ تي ڪنهن به ڌر کي مسافرن لاءِ مشڪلاتون پيدا ڪرڻ يا اُڏامن جي روانگي ۾ رڪاوٽ وجهڻ جي اجازت نه ڏني ويندي.
ياد رهي ته گذريل ڏينهن پي آءِ اي جي ايئرڪرافٽ انجنيئرز ۽ انتظاميه وچ ۾ تڪرار سبب آپريشن معطل ٿي ويو هو. انجنيئرز سي اي او جي روين تي اعتراض ڪندي جهازن جي ڪليئرنس روڪي ڇڏي هئي، جنهن سبب 12 بين الاقوامي پروازون متاثر ٿيون ۽ خاص طور تي عمره زائرين کي سخت تڪليفن کي منهن ڏيڻو پيو.
سوسائٽي آف ايئرڪرافٽ انجنيئرز اعلان ڪيو آهي ته جيستائين سي اي او جو رويو تبديل نه ٿيندو، تيستائين هو ڪم نه ڪندا.
ان صورتحال جي باوجود، پي آءِ اي انتظاميه متاثر ٿيل مسافرن کي سفر جي سهولت ڏيڻ لاءِ پنهنجون ڪوششون تيز ڪري ڇڏيون آهن.
