راولپنڊي (ويب ڊيسڪ) پاڪ فوج جي ترجمان ليفٽننٽ جنرل احمد شريف چوڌري چيو آهي ته پاڪستان جي فوجي ترقياتي حڪمت عملي هميشه مؤثر ۽ ڪارگر پليٽفارمز سان گڏ اندروني ٽيڪنالاجي تي ٻڌل رهي آهي. هن واضح ڪيو ته پاڪستان ڀارت سان هٿيارن جي ڊوڙ ۾ شامل ناهي ۽ نه ئي ڪڏهن انگن اکرن کي لڪائڻ جي ڪوشش ڪئي آهي.
اھڙو اظهار هن عالمي جريدي بلوم برگ کي ڏنل انٽرويو دوران ڪيو. ڊي جي آءِ ايس پي آر جو چوڻ هو ته پاڪستان هر قسم جي ٽيڪنالاجي، چاهي اها پاڻ تيار ڪيل هجي يا مشرقي يا مغربي، حاصل ڪرڻ لاءِ تيار رهندو آهي.
هن وڌيڪ چيو ته معرڪھ حق دوران ڀارت پاڪستان جو ڪو به جنگي جهاز نه ڪيرائي سگھيو. بلوم برگ جي رپورٽ موجب، آمريڪي صدر ڊونلڊ ٽرمپ هڪ هفتي اڳ 7 ڀارتي جهازن جي ڪريل وڃڻ جي تصديق ڪري چڪو آهي.
رپورٽ ۾ ڄاڻايو ويو ته معرڪھ حق ۾ پاڪستان جي چيني ساخته J-10C جنگي جهازن رافيل سميت ڪيترائي ڀارتي فضائي جهاز ڪيرايا. ڊي جي آءِ ايس پي آر ان معرڪي دوران پاڪستاني هٿيارن، خاص طور تي چيني پليٽفارمز جي مؤثر ڪارڪردگي جي تصديق ڪئي.
بلوم برگ موجب، پاڪستان آگسٽ ۾ Z-10ME حمله آور هيليڪاپٽر کي به پنهنجي هٿيارن جي فهرست ۾ شامل ڪرڻ جو اعلان ڪيو. پاڪستان چيني هٿيارن سان گڏوگڏ آمريڪي ساخته F-16 جهازن جو به استعمال ڪري ٿو.
