اسلام آباد (ويب ڊيسڪ) ڊي جي آءِ ايس پي آر ليفٽيننٽ جنرل احمد شريف چوڌري چيو آهي ته هڪ مخصوص شخص جو سياسي بيانيو هاڻي قومي سلامتي لاءِ سنجيده خطرو بڻجي چڪو آهي، ۽ ڪنهن کي به اجازت نه ڏني ويندي ته هو عوام کي پاڪ فوج جي خلاف ڀڙڪائي.
اسلام آباد ۾ پريس ڪانفرنس دوران فوجي ترجمان چيو ته هڪ فرد جي ذاتي خواهشن ۽ سياسي بيانيي سبب رياست کي چيلينجن کي منهن ڏيڻو پيو آهي. هن چيو ته اهو شخص سمجهي ٿو ته جيڪڏهن هو نه هجي ته ڪجهه به نه هجي، ۽ اهڙي سوچ رياست جي سلامتي لاءِ نقصانڪار آهي.
فوج کي سياست کان پري رکو
ليفٽيننٽ جنرل احمد شريف چيو ته پاڪ فوج ڪنهن به سياسي جماعت، لسانيت يا فرقيواريت جي نمائندگي نٿي ڪري.
هن چيو ته فوج جا آفيسر ۽ جوان عام گهراڻن مان آهن ۽ روزانو ملڪ لاءِ قربانيون ڏئي رهيا آهن.
ترجمان چيو ته جيڪڏهن ڪو شخص پنهنجي ذاتي مفادن لاءِ فوج يا ان جي قيادت تي تنقيد ڪري ٿو ته اهو عمل مناسب ناهي.
هن زور ڏنو ته سياست پنهنجي جاءِ تي، پر فوج کي ان کان پري رکيو وڃي.
عوام کي فوج خلاف ڀڙڪائڻ جي اجازت نه ڏني ويندي
ڊي جي آءِ ايس پي آر چيو ته اهو برداشت نه ڪيو ويندو ته پاڪستان جي عوام کي فوج خلاف اڀاريو وڃي.
هن چيو ته فوج ملڪ جي سلامتي جي پهرين قطار ۾ بيٺل آهي ۽ ڪنهن به قسم جي رياست مخالف مهم کي روڪيو ويندو.
پريس ڪانفرنس دوران هڪ وڊيو پڻ ڏيکاري وئي جنهن ۾ دعويٰ ڪئي وئي ته ڪجهه سياسي سوشل ميڊيا اڪائونٽس افغانستان ۽ ڀارت مان هلائي رهيا آهن.
ترجمان چيو ته ڪجهه غير ملڪي ميڊيا پليٽ فارمز پاڪستان جي اندروني سياست ۽ فوج خلاف بيانن کي وڌائي رهيا آهن.
اظهارِ راءِ جي آزادي قومي سلامتي جي قيمت تي نه ٿي
فوجي ترجمان چيو ته آئين اظهارِ راءِ جي آزادي ڏئي ٿو، پر قومي سلامتي ۽ رياستي ادارن خلاف مهم هلائڻ جي اجازت نٿي ڏئي.
هن چيو ته ڪجهه حلقا اهڙو بيانيو پکيڙي رهيا آهن جنهن کي ڀارتي ۽ افغاني ميڊيا وڌيڪ هٿي ڏئي رهي آهي.
غداري جا الزام ورهائڻ مناسب ناهي
ليفٽيننٽ جنرل احمد شريف چيو ته ڪنهن به شخص کي اهو حق ناهي ته هو ٻين کي غدار قرار ڏئي.
هن چيو ته فوج سان تعلق رکندڙ ماڻهن يا ادارن تي اهڙا الزام لڳائڻ غير ذميوارانه عمل آهي.
سوشل ميڊيا تي منظم مهم هلائي پئي وڃي
ڊي جي آءِ ايس پي آر چيو ته ڪجهه سوشل ميڊيا اڪائونٽس منظم طريقي سان فوج خلاف پروپيگنڊا ڪري رهيا آهن، ۽ ڪجهه غير ملڪي نيٽ ورڪ انهن بيانن کي وڌائي رهيا آهن.
هن چيو ته اهڙي مهم جو مقصد رياستي ادارن کي ڪمزور ڪرڻ آهي، جيڪو ڪنهن به صورت ۾ برداشت نه ڪيو ويندو.
فوج جا جوان جانون ڏئي رهيا آهن
ترجمان چيو ته پاڪ فوج جا جوان ۽ آفيسر دهشتگردي خلاف جنگ ۾ جانون قربان ڪري رهيا آهن، جڏهن ته ڪجهه حلقا فوج خلاف منفي مهم هلائي رهيا آهن.
هن چيو ته تنقيد ڪندڙن کي گهرجي ته ملڪ جي سلامتي لاءِ قربانيون ڏيندڙن جو احترام ڪن.
خيبرپختونخوا ۾ وڌندڙ دهشتگردي تي به ڌيان ڏي
هن چيو ته جنهن صوبي ۾ انهن جي حڪومت آهي، اتي وڌندڙ دهشتگردي تي به ڳالهه ٿيڻ گهرجي.
هن سوال ڪيو ته گذريل پنجن سالن ۾ ڪي پي ۾ ڪنهن دهشتگرد کي سزا ڏني وئي؟
ملڪ کي بچائڻ سڀني جي ذميواري آهي
ڊي جي آءِ ايس پي آر ميڊيا تي به زور ڏنو ته غير اهم موضوعن بدران قومي مسئلن تي ڌيان ڏنو وڃي.
هن چيو ته ملڪ کي بچائڻ جو ذمو صرف فوج تي ناهي، پر هر شهري ذميوار آهي.
فوج ۽ عوام جي وچ ۾ دراڙ وجهڻ وارو ڪامياب نه ٿيندو
ترجمان چيو ته فوج ۽ عوام جي وچ ۾ اختلاف پيدا ڪرڻ جي ڪنهن به ڪوشش کي ناڪام بڻايو ويندو.
هن چيو ته رياست فوج نه پر حڪومت ۽ ادارن جو مجموعو آهي، ۽ فوج رياست جو هڪ اهم ادارو آهي.
گورنر راج جو فيصلو حڪومت جو هوندو
هڪ سوال جي جواب ۾ هن چيو ته گورنر راج جو فيصلو حڪومت ڪندي، فوج جو ان سان ڪو تعلق ناهي.
دهشتگردي خلاف جنگ جاري رهندي
هن چيو ته دهشتگردي هڪ ڏينهن ۾ ختم نٿي ٿي سگهي، ان لاءِ سياسي اتفاق ۽ نيشل ايڪشن پلان تي مڪمل عملدرآمد ضروري آهي.
