اسلام آباد (ويب ڊيسڪ) ڊي جي آءِ ايس پي آر جو بيان، جنرل (ر) فيض حميد جو ڪورٽ مارشل قانوني ۽ عدالتي عمل قرار.
اسلام آباد ۾ سينيئر صحافين کي بريفنگ ڏيندي ڊائريڪٽر جنرل انٽر سروسز پبلڪ ريليشنز (آءِ ايس پي آر) ليفٽيننٽ جنرل احمد شريف چوڌري چيو آهي ته جنرل (ر) فيض حميد جو ڪورٽ مارشل هڪ خالص قانوني ۽ عدالتي عمل آهي، ان تي ڪنهن به قسم جي اڳڪٿين کان پاسو ڪيو وڃي۔
هن چيو ته جيئن ئي عملدرآمد مڪمل ٿيندو، ان بابت قوم کي آگاهه ڪيو ويندو۔ افغانستان تي حملي بابت سوال تي ڊي جي آءِ ايس پي آر وضاحت ڪندي چيو ته پاڪستان جڏهن به حملو ڪري ٿو ته کليل اعلان ڪندو آهي، آڪٽوبر ۾ افغانستان تي ٿيل حملو به سڀني کي ٻڌايو ويو هو۔
ليفٽيننٽ جنرل احمد شريف چوڌري ٻڌايو ته دهشتگردي خلاف ڪميٽيون قائم آهن جن ۾ فوج جا نمائندا شامل آهن، جڏهن ته بلوچستان حڪومت نيشنل ايڪشن پلان تحت دهشتگردي خلاف مڪمل عملدرآمد ڪري رهي آهي۔
هن وڌيڪ چيو ته سرحد تي فوج ۽ ايف سي بارڊر منيجمنٽ ڪري رهيا آهن، جڏهن ته افغان حڪومت جا اعليٰ عهديدار پاڻ بيان ڏئي رهيا آهن ته هو حملو ڪندا۔ ڊي جي آءِ ايس پي آر انڪشاف ڪيو ته ميانوالي ۾ ٿيل دهشتگردي ۾ آمريڪي هٿيار استعمال ٿيا، جيڪي عالمي سطح تي خطري جو سبب بڻجي رهيا آهن۔
هن چيو ته دهشتگرد آمريڪي هٿيار ۽ بلٽ پروف گاڏيون استعمال ڪري رهيا آهن، اهي منشيات مان هٿيار خريد ڪن ٿا، ۽ اسان ٽي ٽي پي ۽ ٽي ٽي اي ۾ ڪو فرق نٿا سمجهون۔ ڊي جي آءِ ايس پي آر موجب آمريڪا 7.2 ارب ڊالر جا هٿيار افغانستان ۾ ڇڏي ويو، ۽ دهشتگردي جي واقعن ۾ 29 ڀيرا آمريڪي هٿيار استعمال ٿيل مليا آهن۔
ليفٽيننٽ جنرل احمد شريف چوڌري چيو ته دهشتگردي خلاف جنگ فوج ۽ پاڪستاني عوام گڏجي کٽڻي آهي، ۽ پاڪستان هر صورت ۾ دهشتگردي خلاف جنگ ۾ ڪامياب ٿيندو۔
