راولپنڊي (ويب ڊيسڪ) ڊائريڪٽر جنرل انٽر سروسز پبلڪ ريليشنز (آءِ ايس پي آر) ليفٽيننٽ جنرل احمد شريف چوڌري چيو آهي ته افغان طالبان جي موجوده حڪومت نه رڳو پاڪستان پر سموري خطي ۽ دنيا لاءِ خطرو بڻجي وئي آهي.
هن ٻڌايو ته آمريڪي فوج جي انخلا دوران 7.2 بلين ڊالرز جو فوجي سامان افغانستان ۾ ڇڏي ويو، جيڪو هاڻي دهشتگردن جي هٿ ۾ آهي.
25 نومبر تي سينيئر صحافين سان ڳالهائيندي ڊي جي آءِ ايس پي آر ٻڌايو ته 4 نومبر 2025 کان اڄ تائين دهشتگردي خلاف 4910 انٽيليجنس بيسڊ آپريشنز ڪيا ويا، جن ۾ 206 دهشتگرد مارجي ويا. هن سال مجموعي طور تي 67023 آپريشنز ڪيا ويا، جن ۾ 1873 دهشتگرد مارجي ويا، جن مان 136 افغان شامل هئا.
هن چيو ته سرحدي انتظام بابت غلط پروپيگنڊا ڪيو وڃي ٿو، جڏهن ته پاڪ-افغان بارڊر ڏکيا ۽ دشوار گذار علائقن تي مشتمل آهي. خيبرپختونخوا ۾ 1229 ڪلوميٽر ڊگهي سرحد آهي، جنهن ۾ 20 ڪراسنگ پوائنٽس آهن.
ڊي جي آءِ ايس پي آر جو چوڻ هو ته افغانستان مان دهشتگردن جي دراندازي لاءِ طالبان مڪمل سهولت فراهم ڪن ٿا، جڏهن ته بارڊر ايريا ۾ سياسي، دهشتگردي ۽ ڪرائم جو مضبوط نيٽورڪ موجود آهي.
هن واضح ڪيو ته پاڪستان جو موقف آهي ته افغان طالبان دهشتگردن جي سهولتڪاري بند ڪن ۽ دوحه معاهدي تي عملدرآمد لاءِ قابلِ تصديق ميڪانزم تي راضي ٿين.
جنرل احمد شريف چوڌري چيو ته افغان طالبان جو دعويٰ ته دهشتگرد “پاڪستاني مهمان” آهن، غير منطقي آهي. جيڪڏهن اهي پاڪستاني آهن ته کين پاڪستان حوالي ڪيو وڃي.
هن وڌيڪ چيو ته افغانستان ۾ القاعده، داعش ۽ ٻين دهشتگرد تنظيمون موجود آهن، جيڪي فنڊنگ ۽ هٿيار حاصل ڪري پاڪستان خلاف استعمال ڪن ٿيون.
ڊي جي آءِ ايس پي آر چيو ته خونريزي ۽ واپار گڏ نٿا هلي سگهن، پاڪستان جو مسئلو افغان عوام سان نه پر طالبان رجيم سان آهي، جيڪا سڀني قوميتن ۽ خاص طور عورتن جي نمائندگي نٿي ڪري.
هن ٻڌايو ته بلوچستان ۾ نيشل ايڪشن پلان تحت ضلعي، ڊويزنل ۽ صوبائي سطح تي ڪميٽيون قائم ڪيون ويون آهن، جڏهن ته ايران مان ڊيزل جي اسمگلنگ تي ڪامياب ڪيڪ ڊائون کانپوءِ روزانو 20.5 ملين ليٽر کان گهٽجي 2.7 ملين ليٽر رهجي وئي آهي، جيڪا اڳ دهشتگردي جي فنڊنگ لاءِ استعمال ٿيندي هئي.
