اسلام آباد (ويب ڊيسڪ) پاڪستان تحريڪ انصاف جي باني عمران خان کي 190 ملين پائونڊ جي نيب ڪيس ۾ سزا ڏيندڙ جج ناصر جاويد رانا جي مقرري اسلام آباد هاءِ ڪورٽ ۾ چئلينج ڪئي وئي آهي.
شهرين اسامہ رياض، وڪيل رياض حنيف راهي جي ذريعي، جج ناصر جاويد رانا جي مقرري خلاف درخواست داخل ڪئي، جيڪا رجسٽرار آفيس طرفان وصول ڪئي وئي ۽ ان تي ڊائري نمبر پڻ لڳايو ويو.
درخواست ۾ استدعا ڪئي وئي آهي ته جج ناصر جاويد رانا کي درخواست تي فيصلو اچڻ تائين ڪم ڪرڻ کان روڪيو وڃي ۽ سپريم ڪورٽ جي 19 آڪٽوبر 2004 جي حڪمن جي روشني ۾ سندس مقرري جو نوٽيفڪيشن ڪالعدم قرار ڏنو وڃي.
ان سان گڏوگڏ درخواست ۾ اها به گذارش ڪئي وئي آهي ته جيڪڏهن درخواست تي فيصلو اچڻ کان اڳ جج رٽائر ٿي وڃي ته 14 ڊسمبر 2022 کان پوءِ حاصل ڪيل مراعات ۽ واجبات جي واپسي جو حڪم ڏنو وڃي، ۽ کيس رٽائرمينٽ کان پوءِ ڪنهن به پينشن يا ٻين فائدن جو حقدار نه قرار ڏنو وڃي.
واضح رهي ته ناصر جاويد رانا هن وقت ڊسٽرڪٽ اينڊ سيشن جج ويسٽ طور مقرر ٿيل آهي.
