راولپنڊي(ويب ڊيسڪ) پاڪستان تحريڪ انصاف جي باني عمران خان چيو آهي ته افغانستان تي حملن جي نتيجي ۾ دهشتگردي وڌڻ جو خطرو آهي، ۽ ان مسئلي جو حل صرف سياسي طريقي سان ئي ممڪن آهي.
اڊياله جيل ۾ توشه خانه ٽو ڪيس جي ٻڌڻي دوران عمران خان سان ملاقات کان پوءِ پي ٽي آءِ جي چيئرمين بيرسٽر گوهر خان، سينيٽر علي ظفر ۽ بيرسٽر سيف ميڊيا سان ڳالهائيندي ٻڌايو ته خيبرپختونخوا ۾ سياسي تبديلي کان پوءِ باني سان اها پهرين ملاقات هئي، جنهن دوران عمران خان سڀني ايم پي ايز جو شڪريو ادا ڪيو ۽ خوشي جو اظهار ڪيو.
هنن ٻڌايو ته عمران خان علي امين گنڊاپور جي واکاڻ ڪئي ۽ چيو ته خيبرپختونخوا ۾ پي ٽي آءِ جو ووٽ آهي، باني جنهن کي نامزد ڪندو، اهو ئي وزيراعليٰ بڻجندو. باني سڀني عهديدارن کي مبارڪباد ڏني ۽ چيو ته حڪومت جو حق ان کي آهي، جنهن وٽ عوامي مينڊيٽ آهي.
عمران خان دهشتگردي جي مسئلي تي ڳالهائيندي چيو ته پي ٽي آءِ هر قسم جي دهشتگردي جي مذمت ڪري ٿي، فوج به اسان جي آهي، شهيد به اسان جا آهن، عام ماڻهن جو رت نه وهڻ گهرجي. هن زور ڏنو ته دهشتگردي جو خاتمو سياسي حل ذريعي ٿيڻ گهرجي.
بيرسٽر سيف موجب، عمران خان ٽي ايل پي خلاف تشدد جي مذمت ڪئي ۽ چيو ته ان تي احتجاج ٿيڻ گهرجي. هن اهو به چيو ته سندس خاندان فوج ۾ آهي، ۽ فوج سان ڪا دشمني ناهي. غداري جا سرٽيفڪيٽ ورهائڻ بند ٿيڻ گهرجن.
عمران خان جو چوڻ هو ته دهشتگردي خلاف اڳ به آپريشنز ٿيا آهن، پر صرف فوجي ڪارروائيون مسئلي جو حل ناهن. افغانستان تي حملن سان دهشتگردي وڌڻ جو خطرو آهي، ان لاءِ سياسي حڪمت عملي ضروري آهي.
بيرسٽر گوهر خان کان صحافين سوال ڪيو ته جيڪڏهن نیشنل ايڪشن پلان تي عمل ٿيڻ گهرجي ته ڊي جي آءِ ايس پي آر به ساڳيو چئي رهيو آهي، ته پوءِ اختلاف ڪٿي آهي؟ بيرسٽر گوهر خان جواب ڏنو ته ماڻهو نیشنل ايڪشن پلان کي پڙهڻ کانسواءِ غلط فهميون پيدا ڪري رهيا آهن. جنوري ۾ آل پارٽيز ڪانفرنس جي پريس ريليز ۾ نیشنل ايڪشن پلان ۽ ٽارگيٽڊ آپريشنز جو ذڪر موجود آهي.
هن چيو ته باني صرف اهو چئي رهيو آهي ته صرف ملٽري آپريشن سان مسئلا حل ناهن ٿيندا، حڪمت عملي ۾ فرق آهي. باني پي ٽي آءِ نيشنل ايڪشن پلان تي صحيحون به ڪيون ھيون، ۽ جنرل باجوه سان به ملڪ جي مفاد لاءِ ڳالهه ٻولهه ڪئي هئي. عمران خان کي افغان پرڏيھي وزير جي ڀارت جي دوري بابت به آگاهه ڪيو ويو آهي.
