راولپنڊي (ويب ڊيسڪ) پاڪ فوج جي ترجمان آءِ ايس پي آر پاران جاري ڪيل بيان ۾ ڀارت جي فوجي قيادت جي تازي متنازع بيانن تي سخت ردعمل ظاهر ڪيو ويو آهي، جنهن ۾ چيو ويو آهي ته دنيا هاڻي ڀارت کي سرحد پار دهشتگردي جو حقيقي چهرو ۽ علائقائي عدم استحڪام جو مرڪز تسليم ڪرڻ لڳي آهي.
آءِ ايس پي آر موجب، ڀارت جي فوجي قيادت طرفان چونڊ مهم جي پسمنظر ۾ روايتي، من گهڙت ۽ اشتعال انگيز پروپيگنڊا ورجائڻ جو سلسلو جاري آهي، جيڪو هو هر رياستي چونڊ کان اڳ شروع ڪري ڇڏيندو آهي. ترجمان چيو ته معرڪوءِ حق جي پنج مهينا گذرڻ باوجود ڀارت پنهنجي شڪست کي قبول ڪرڻ لاءِ تيار ناهي، ۽ تاريخ کي پنهنجي مرضي سان مسخ ڪرڻ جي ڪوشش ڪري رهيو آهي.
غير ذميوار بيانن تي تنقيد
آءِ ايس پي آر جي بيان ۾ چيو ويو آهي ته ايٽمي طاقت رکندڙ ملڪ جي فوجي قيادت جو سياسي دٻاءَ هيٺ اچي غير ذميوار بيان جاري ڪرڻ انتهائي افسوسناڪ آهي، جنهن سبب ڀارتي عسڪري مشين عوام ۽ عالمي برادري آڏو مذاق جو نشانو بڻجي چڪي آهي. ترجمان خبردار ڪيو ته اهڙي جارحاڻي ذهنيت ڏکڻ ايشيا جي امن لاءِ خطرناڪ ثابت ٿي سگهي ٿي.
تاريخ جي مسخ ڪرڻ جي ڪوشش
بيان ۾ چيو ويو ته ڀارت فلمي انداز ۾ بي بنياد منظر ترتيب ڏئي رهيو آهي، ۽ معرڪوءِ حق ۾ پنهنجي واضح شڪست کي قبول ڪرڻ کان قاصر آهي. ڀارتي فوجي پريس رليز ۾ موجود تضاد ايترو واضح آهي جو ان جو جواب ڏيڻ مناسب ناهي.
پاڪستان جي عزم
ترجمان پاڪ فوج واضح ڪيو ته پاڪستاني قوم ۽ سندس مسلح افواج ملڪ جي سالميت جي تحفظ لاءِ مڪمل طور تي تيار ۽ پرعزم آهن. ڪنهن به جارحيت جو جواب تيز، فيصلائتو ۽ شديد انداز ۾ ڏنو ويندو، جيڪو ايندڙ نسلن لاءِ يادگار هوندو.
آءِ ايس پي آر موجب، ڀارت جي مھم جوئي ۽ غلبه پسند پاليسين جو نقصان نه صرف ڀارتي عوام پر، پر پاسي وارن ملڪن کي به پهچي رهيو آهي، ۽ عالمي برادري هاڻي ڀارت جي حقيقي چهري کي سڃاڻڻ لڳي آهي.
