راولپنڊي(ويب ڊيسڪ) پاڪستان ڀارتي سيڪيورٽي اسٽيبلشمينٽ جي چڙ ڏياريندڙ بيانن تي سخت ردعمل ڏيندي انهن کي غير ذميوار قرار ڏنو آهي. آءِ ايس پي آر موجب اهڙن بيانن سان ڏکڻ ايشيا ۾ امن ۽ استحڪام کي سخت خطرا پيدا ٿي سگهن ٿا. پاڪستان واضح ڪيو آهي ته جيڪڏهن ڀارت طرفان ٻيهر ڪا اڳڀرائي ڪئي وئي ته ان جو جواب اڳ کان وڌيڪ تيز، فيصلائتو ۽ تباهي وارو هوندو.
ڌ آءِ ايس پي آر چيو آهي ته ڀارتي اختيارين جا بيان گمراه ڪندڙ ۽ چڙ ڏياريندڙ آهن، جيڪا جارحيت لاءِ هٿ ٺوڪيو جواز پيدا ڪرڻ جي ڪوشش آهي. پاڪستان خبردار ڪيو آهي ته اهڙن بيانن سان خطي ۾ امن جي صورتحال انتهائي خراب ٿي سگهي ٿي.
پڌرائي ۾ چيو ويو آهي ته ڀارت گذريل سالن کان پاڻ کي مظلوم ظاهر ڪري خطي ۾ دهشتگردي ۽ تشدد کي هوا ڏيندو رهيو آهي ۽ هاڻ دنيا ڀارت کي سرحد پار دهشتگردي جو اصل چهرو ۽ خطي جي بيچيني جو مرڪز تسليم ڪري چڪي آهي.
آءِ ايس پي آر موجب، هن سال ڀارتي جارحيت ٻن ايٽمي طاقت رکندڙ ملڪن کي وڏي جنگ جي ڪناري تي آڻي بيهاريو هو. ڀارت کي پنهنجي تباه ٿيل جهازن ۽ پاڪستان جي ڊگهي فاصلي تائين مار ڪندڙ هٿيارن کي نه وسارڻ گهرجي. ڀارت اجتماعي ڀُل جو شڪار ٿي ٻيهر ٽڪراءُ طرف وڌي رهيو آهي، جيڪو خطي لاءِ انتهائي خطرناڪ ثابت ٿي سگهي ٿو.
پڌرائي ۾ خبردار ڪيو ويو آهي ته جيڪڏهن ڀارت طرفان نئون تڪرار شروع ڪيو ويو ته پاڪستان بنا ڪنهن هٻڪ جي مڪمل طاقت سان جواب ڏيندو. جيڪي نئين “نارمل” جي ڳالهه ڪري رهيا آهن، انهن کي ڄاڻ هجڻ گهرجي ته پاڪستان ان جو جواب ڏيڻ لاءِ مڪمل تياري رکي ٿو.
پاڪستان جي هٿياربند فوج ۽ عوام ڀارتي جارحيت جو مقابلو ڪرڻ جي مڪمل صلاحيت ۽ عزم رکن ٿا. ڀارت جي جغرافيائي تحفظ جو وهم هن ڀيري ختم ڪيو ويندو. پاڪستان دشمن جي سرزمين جي پري پري حصن کي نشانو بڻائڻ جي صلاحيت رکي ٿو.
آءِ ايس پي آر آخر ۾ چيو آهي ته ڀارت پاڪستان کي مٽائڻ جون ڳالهيون ڪري رهيو آهي، پر اهو ياد رکڻ گهرجي ته جيڪڏهن نوبت اتي پهتي ته نتيجو ٻنهي طرفن لاءِ هڪجهڙو هوندو.
