راولپنڊي (ويب ڊيسڪ) بلوچستان جي سرحدي علائقي اسپن بولدڪ چمن سيڪٽر ۾ پاڪ فوج جي سخت ۽ مؤثر جوابي ڪارروائي کانپوءِ افغان طالبان جنگبندي جي اپيل ڪري ڇڏي آهي. سڪيورٽي ذريعن موجب، پاڪ فوج جي ردعمل سبب افغان طالبان گھٽڻ ٽيڪي ڇڏيا.
ذريعن جو چوڻ آهي ته افغان طالبان سوشل ميڊيا تي پاڪ فوج جي هٿيارن تي قبضي جون من گهڙت وڊيوز جاري ڪري رهيا آهن، جيڪي سچائي کان وانجهيل آهن. انهن وڊيوز ذريعي جھوٽي خبرون پکيڙڻ جي ڪوشش ڪئي پئي وڃي، جن ۾ ڪابه صداقت ناهي.
پاڪ فوج طرفان افغان طالبان جي جارحيت جو منهن ٽوڙ جواب ڏنو پيو وڃي. اسپن بولدڪ چمن سيڪٽر ۾ پاڪ فوج جي ڪارروائي کانپوءِ افغان طالبان فائر بندي جي اپيل ڪئي آهي. ڪارروائي دوران افغان طالبان ۽ فتنته الخوارج جي اهم هدفن کي نشانو بڻايو ويو، جنهن ۾ ڪيتريون ئي پوسٽون، ٽينڪ ۽ عملو تباهه ڪيو ويو.
سڪيورٽي ذريعن جو چوڻ آهي ته پاڪ فوج افغان طالبان ۽ فتنہ الخوارج جي ڪنهن به جارحيت جو جواب ڏيڻ لاءِ مڪمل تيار آهي. جارحيت جو جواب شدت سان ۽ اميد کان وڌيڪ ڏنو ويندو، جيڪو دشمن لاءِ سبق آموز ثابت ٿيندو.
