استنبول (ويب ڊيسڪ) پاڪستان ميزبان ملڪ ترڪي جي چوڻ تي افغان طالبان سان ٻيهر ڳالهين لاءِ راضي ٿي ويو آهي، جنهن جو مقصد امن جي عمل کي ٻيهر هٿي ڏيڻ آهي. ذريعن موجب پاڪستاني وفد جيڪو استنبول مان وطن واپسي لاءِ تيار هو، هاڻ وڌيڪ ترسيل ڪندو ته جيئن ڳالهين جو سلسلو جاري رهي.
ذريعن جو چوڻ آهي ته ڳالھين جو مرڪزي نقطو پاڪستان جو اهو ئي مطالبو هوندو ته افغانستان پنهنجي سرزمين تي موجود دهشتگردن خلاف واضح، تصديق جوڳي ۽ مؤثر ڪارروائي ڪري. پاڪستان هڪ ڀيرو ٻيهر زور ڏنو آهي ته افغان سرزمين کي پاڪستان خلاف دهشتگردي لاءِ استعمال نه ٿيڻ گهرجي.
ياد رهي ته ان کان اڳ استنبول ۾ ٿيل ڳالھيون ڪامياب نه ٿي سگهيون ھيون، ان سلسلي ۾ سُڌ سماءَ واري وفاقي وزير عطاءُ الله تارڙ پنهنجي بيان ۾ چيو هو ته ڳالھين جو واحد ايجنڊا افغانستان مان پاڪستان خلاف دهشتگردي کي روڪڻ هو، پر افغان ڌر منطقي ۽ جائز مطالبن کي مڃڻ باوجود ڪابھ عمل جوڳي ضمانت ڏيڻ کان پاسو ڪيو.
پاڪ – افغان لاڳاپن سبب هن نئين اڳڀرائي کي امن جي هڪ ٻي ڪوشش طور ڏٺو پيو وڃي، جتي ميزبانن جي ڪردار کي اهميت حاصل آهي. هاڻ ڏسڻو اهو آهي ته افغان طالبان پاڪستان جي مطالبن تي ڪهڙو ردِعمل ڏين ٿا ۽ ڇا هي ڳالهين جو دور خطي ۾ امن جي راهه هموار ڪري سگهي ٿو.
