اسلام آباد(ويب ڊيسڪ) وزيراعظم محمد شهباز شريف چيو آهي ته ان شاءَ الله اهو وقت پري ناهي جڏهن پاڪستان مڪمل طور قرضن کان آزاد ٿي معاشي طور خودڪفيل ملڪ بڻجي ويندو. آءِ ايم ايف پاران معاشي سڌارن جي مؤثر نفاذ تي اطمينان جو اظهار ۽ جاري پروگرام تحت مالي ادائيگي کي وزيراعظم حڪومت جي معاشي ٽيم جي محنت جو اعتراف قرار ڏنو.
وزيراعظم چيو ته سڌارن جي ايجنڊا لاڳو ڪرڻ ۽ ملڪ کي معاشي ترقي جي راهه تي آڻڻ ۾ فلڊ مارشل سيد عاصم منير، چيف آف آرمي اسٽاف ۽ چيف آف ڊيفنس فورسز جو اهم ڪردار رهيو آهي. هن چيو ته آءِ ايم ايف جي تازين ادائيگين مان ثابت ٿئي ٿو ته پاڪستان معاشي استحڪام ۽ ترقي لاءِ ضروري قدمن تي عملدرآمد ڪري رهيو آهي، جڏهن ته ناڻي واري وزير محمد اورنگزيب ۽ سندن ٽيم جي محنت تعريف جوڳي آهي.
شهباز شريف چيو ته ملڪ کي ڊي فالٽ جي ڪناري کان واپس آڻي استحڪام ڏانهن وٺي وڃڻ ڏکيو مرحلو هو، جنهن لاءِ سياسي جماعتن پنهنجي سياست قربان ڪئي ۽ قوم معاشي مشڪلاتون برداشت ڪيون. هن چيو ته الله جي فضل سان پاڪستان جون معاشي سڌارا ۽ ڊيجيٽلائيزيشن عالمي سطح تي ڪيس اسٽڊي طور ڏٺيون پيون وڃن، ۽ ملڪ جي معاشي ترقي جو خواب جلد حقيقت بڻجندو.
وزيراعظم جو چوڻ هو ته استحڪام کان پوءِ هاڻي ترقي جي مرحلي ۾ وڌيڪ محنت جي ضرورت آهي. بطور خادمِ پاڪستان، هو عوام جي خوشحالي ۽ ملڪ کي قرضن کان مڪمل نجات ملڻ تائين جدوجهد جاري رکندو۔
