اسلام آباد(ويب ڊيسڪ) وزيراعظم شهباز شريف چيو آهي ته پاڪستان ۾ هر شهري کي پنهنجي مذهب تي عمل ڪرڻ جي مڪمل آزادي حاصل آهي، پر ڪنهن کي به من ماني ڪرڻ جي اجازت نه ڏني ويندي.
وزيراعظم هائوس ۾ ڪرسمس جي تقريب کي خطاب ڪندي هن چيو ته حضرت عيسيٰ عليه السلام انسانيت لاءِ خدمت جو پيغام آندو، جڏهن ته قرآن پاڪ ۾ سندن والدہ جو بلند مقام بيان ڪيو ويو آهي.
شهباز شريف مسيحي برادري جي تاريخي ۽ قابلِ قدر ڪردار کي ڀيٽا پيش ڪندي چيو ته حڪومت اقليتن جي حقن ۽ تحفظ لاءِ مضبوط نموني سان بيٺل آهي. هن ياد ڏياريو ته نواز شريف جي دور ۾ به اقليتن جي حقن جي پاسداري ڪئي وئي هئي.
وزيراعظم وڌيڪ چيو ته وطن لاءِ رت قربان ڪندڙ مسيحي ڀائرن کي سلام پيش ڪريان ٿو، جڏهن ته اسان جا شاهينن ڀارت جا 7 جهاز ڪيرائي ملڪ جو دفاع ڪيو.
ڪرسمس جي موقعي تي جاري پيغام ۾ وزيراعظم چيو ته پاڪستان ۽ دنيا ۾ رهندڙ مسيحي برادري کي دل جي گهراين سان مبارڪباد پيش ڪريان ٿو. هن دعا ڪئي ته حضرت عيسيٰ عليه السلام جي ولادت جو هي مبارڪ ڏينهن ملڪ ۾ امن، استحڪام ۽ خوشحالي جي نويد بڻجي.
