اسلام آباد (ويب ڊيسڪ) وزيراعظم شهباز شريف سان انڊر 19 ايشيا ڪرڪيٽ ڪپ جي فاتح ٽيم ملاقات ڪئي، جنهن دوران وزيراعظم رانديگرن لاءِ هڪ هڪ ڪروڙ رپيا انعام جو اعلان ڪيو. وزيراعظم جي طرفان فاتح ٽيم جي اعزاز ۾ استقباليه رکيو ويو، جتي شهباز شريف پاڻ سڀني رانديگرن جو استقبال ڪيو. ان موقعي تي چيئرمين پي سي بي محسن نقوي، وفاقي وزير ۽ ڪابينا جا رڪن به موجود هئا.
وزيراعظم هر هڪ رانديگرن سان هٿ ملايو ۽ ڀارت خلاف شاندار ڪارڪردگي تي کين ساراهيو. ٽيم مينيجمينٽ جي هر ميمبر لاءِ به پنجويهه، پنجويهه لک رپيا انعام جو اعلان ڪيو. شهباز شريف چيو ته توهان پاڪستان جو نالو دنيا ۾ روشن ڪيو آهي، ڀارت کي بدترين شڪست ڏيڻ تي مبارڪباد پيش ڪريان ٿو. ٽيم جي جوش ۽ جذبي سان کيڏڻ جو منظر يادگار هو، جنهن تي سمورا پاڪستاني فخر محسوس ڪن ٿا.
وزيراعظم رانديگرن کي چيو ته اميد آهي توهان ڪارڪردگي جو تسلسل برقرار رکندا ۽ جلد ئي انڊر 19 ورلڊ ڪپ به پاڪستان آڻيندا. هن چيئرمين پي سي بي کي هدايت ڪئي ته رانديگرن جو مڪمل خيال رکيو وڃي ۽ کين هر سهولت فراهم ڪئي وڃي. وزيراعظم سمير منهاس کي بهترين ڪارڪردگي تي “هيرو” قرار ڏنو ۽ محسن نقوي کي پي سي بي جا معاملا سٺي نموني هلائڻ تي مبارڪباد ڏني.
استقباليي کان پوءِ رانديگرن جي اعزاز ۾ ماني جي دعوت رکي وئي، جتي وزيراعظم رانديگرن سان گڏ ويهي کاڌو کائو ۽ کين هر هڪ سان ڳالهه ٻولهه ڪئي. رانديگرن عزت افزائي تي وزيراعظم ۽ عوام جو شڪريو ادا ڪيو.
بعد ۾ هيڊ ڪوچ شاهد انور پريس ڪانفرنس ۾ ٻڌايو ته هي عمل سترهن جون 2025 کان شروع ٿيو، جنهن ۾ ستر نوجوان رانديگرن جا ٽرائل ٿيا. انهن مان ٽيهه رانديگرن جو ڪيمپ لڳايو ويو ۽ مقصد صرف ايشيا ڪپ ۽ شائقين جا دل کٽڻ هو.
سرفراز احمد ٻڌايو ته وزيراعظم سان ملاقات ۾ سڀني رانديگرن لاءِ هڪ هڪ ڪروڙ رپيا انعام جو اعلان ٿيو، جيڪو سندن محنت جو نتيجو آهي. هن چيو ته وزيراعظم نوجوان رانديگرن جي وڏي حوصلا افزائي ڪئي ۽ سمير احمد ۽ عثمان خان جي شاندار شراڪت کي ساراهيو.
ڪپتان فرحان يوسف چيو ته مينيجمينٽ مڪمل سپورٽ ڏني، جنهن سان ٽيم ايشيا ڪپ کٽيو. هن چيو ته ورلڊ ڪپ ۾ انفرادي ڪارڪردگي ڏيکارڻ جي ڪوشش ڪندس. سمير منهاس چيو ته پلان سادو هو، وڪٽ تي وقت گذارڻو هو ۽ ٽيم لاءِ رنز ڪرڻا هئا، ڀارت خلاف ميچ ۾ ڪو دٻاءُ نه هو.
سرفراز احمد وڌيڪ چيو ته رانديگرن وڏي ميچ ۾ وڏو اسڪور ڪيو، جيڪو ٽيم جي گڏيل بهترين ڪارڪردگي سان ممڪن ٿيو. هن چيو ته ڀارتي ٽيم جو رويو غير مناسب هو، پر اسان پنهنجي رانديگرن کي چيو ته رڳو سپورٽس مين اسپيرٽ ڏيکاريو ۽ پنهنجي ڪرڪيٽ کيڏيو.
