بيجنگ (عالمي خبر) — چين پنهنجي فوج پيپلز لبريشن آرمي (پي ايل اي) ۾ هڪ انوکيو تربيت وارو نظام متعارف ڪرايو آهي، جنهن تحت سپاهي انساني انباڪس ۾ تبديل ٿي رهيا آهن، ته جيئن جديد ٽيڪنالاجي جي ناڪامي جي صورت ۾ به ذهني حساب ڪتاب ذريعي جنگي فيصلا ڪري سگهن.
چيني سرڪاري نشرياتي اداري سي سي ٽي وي جي رپورٽ موجب، هي پروگرام پي ايل اي جي ان حڪمت عملي جو حصو آهي، جنهن جو مقصد سپاهين کي ذهني ڪيلڪوليشن جي مهارت سان ليس ڪرڻ آهي، خاص طور تي ريڊار، نيٽ ورڪ يا ٻين هاءِ ٽيڪ نظامن جي ناڪامي جي صورت ۾.
رپورٽ ۾ ٻڌايو ويو ته هڪ فوجي مشق دوران ڪيپٽن شو ميڊو ريڊار سسٽم جي بند ٿيڻ باوجود چند سيڪنڊن ۾ ٽي هدفن جي سمت، بلندي ۽ رفتار جو حساب لڳائي درست نشانو لڳايو.
هي تربيت شروعاتي طور تي لاجسٽڪ سپورٽ ۽ فوجي سامان جي حساب ڪتاب لاءِ شروع ڪئي وئي هئي، پر 2019 کان پوءِ ان کي جنگي تربيت ۾ به شامل ڪيو ويو. پي ايل اي جي ترجمان موجب، اباکس ڪيلڪوليشن ٽيڪنڪ توپخاني ۽ انفنٽري يونٽن کي گولاباري جي صحيح وقت جي تعين ۾ مدد ڏئي ٿي، ۽ سپاهين کي دٻاءَ هيٺ ڌيان برقرار رکڻ جي تربيت به فراهم ڪري ٿي.
هڪ فوجي آفيسر جو چوڻ آهي ته، “جيڪڏهن جنگ دوران هاءِ ٽيڪ آلات ناڪام ٿي وڃن، ته انساني ذهن جي حساب ڪتاب بهترين متبادل ثابت ٿي سگهي ٿو.”
سي سي ٽي وي موجب، پي ايل اي جي اباکس ٽيم 1994 ۾ قائم ڪئي وئي هئي، جيڪا 8 سالن جي عمر کان ٻارن کي تربيت ڏئي ٿي. ڪيپٽن شو ميڊو 11 سالن جي عمر ۾ پروگرام ۾ شامل ٿي، ۽ قومي و بين الاقوامي مقابلا کٽڻ کانپوءِ هاڻي فوجي سپاهين کي هي مهارت سيکاري رهي آهي
