واشنگٽن (عالمي خبر) آمريڪي صدر ڊونلڊ ٽرمپ اعلان ڪيو آهي ته سندس حڪومت چين سان واپاري لاڳاپا ختم ڪرڻ تي سنجيدگي سان غور ڪري رهي آهي. هن فيصلي جي ممڪن سبب طور چين پاران آمريڪي سويا بين جي خريداري بند ڪرڻ کي ذميوار قرار ڏنو پيو وڃي.
سوشل ميڊيا پليٽفارم ٽرتھ سوشل (Truth Social) تي جاري بيان ۾ ٽرمپ چيو ته، “چين ڄاڻي واڻي آمريڪي سويا بين خريدڻ بند ڪيو آهي، جيڪو آمريڪي معيشت خلاف هڪ دشمني وارو قدم آهي.”
ٽرمپ جو چوڻ هو ته چين جي اهڙي رويي سبب آمريڪي آبادگار سخت مشڪلاتن جو شڪار ٿي ويا آهن. هن واضح ڪيو ته سندس حڪومت هاڻي چين سان ڪوڪنگ آئل سميت ڪيترن ئي واپاري معاهدن تي نظرثاني ڪري رهي آهي.
آمريڪي صدر وڌيڪ چيو ته، “اسان آساني سان پنهنجو ڪوڪنگ آئل پاڻ تيار ڪري سگهون ٿا، ان لاءِ اسان کي چين تي ڀاڙڻ جي ڪا ضرورت ناهي.”
ٽرمپ جي هن بيان کانپوءِ معاشي ماهرن خبردار ڪيو آهي ته جيڪڏهن واشنگٽن واقعي چين سان واپاري لاڳاپا ختم ڪري ڇڏيا ته عالمي مارڪيٽن ۾ شديد اڻويهه پيدا ٿي سگهي ٿي، خاص طور تي زراعت ۽ خوراڪ جي شعبي ۾.
