واشنگٽن (ويب ڊيسڪ) آمريڪي صدر ڊونلڊ ٽرمپ هڪ ڀيرو ٻيهر دعويٰ ڪئي آهي ته سعودي عرب جلد ابراهيمي معاهدي ۾ شامل ٿي سگهي ٿو. آمريڪي ٽي وي پروگرام 60 منٽس ۾ ڳالهائيندي، صدر ٽرمپ چيو ته مون کي لڳي ٿو ته سعودي عرب ابراهيمي معاهدي جو حصو بڻجي ويندو، اسان ڪو حل ڪڍي وٺنداسين.
انٽرويو دوران جڏهن اينڪر سوال ڪيو ته ڇا سعودي عرب فلسطيني رياست جي قيام کان سواءِ معاهدي ۾ شامل ٿيندو؟ ته ٽرمپ جواب ڏنو ته “اهو ممڪن آهي، ڇو ته اهو معاملو اسرائيل ۽ مون تي دارومدار رکي ٿو.”
ٻئي طرف، وائٽ هائوس جي اختيارين تصديق ڪئي آهي ته سعودي ولي عهد محمد بن سلمان 18 نومبر تي واشنگٽن جو دورو ڪندو، جتي سندس صدر ٽرمپ سان ملاقات طئي ٿيل آهي. ملاقات دوران ٻنهي ملڪن جي لاڳاپن، علائقائي سلامتي ۽ اسرائيل سان ممڪن امن معاهدي تي ڳالهيون ٿينديون.
آمريڪي ميڊيا موجب، صدر ٽرمپ سعودي عرب تي ابراهيمي معاهدي ۾ شامل ٿيڻ لاءِ دٻاءُ وڌائي رهيو آهي ته جيئن آمريڪا جي مشرقِ وسطىٰ لاءِ امن منصوبي کي هٿي ملي.
ياد رهي ته ابراهيمي معاهدي جو آغاز 2020 ۾ ٿيو هو، جنهن تحت گڏيل عرب امارات، بحرين ۽ مراڪش اسرائيل سان سفارتي لاڳاپا قائم ڪيا هئا.
