واشنگٽن (ويب ڊيسڪ) آمريڪي صدر ڊونلڊ ٽرمپ دعويٰ ڪئي آهي ته پاڪستان، چين ۽ روس ڳجهي نموني ايٽمي هٿيارن جا تجربا ڪري رهيا آهن، جڏهن ته آمريڪا واحد وڏي طاقت آهي جيڪا اهڙن تجربن کان پاسو ڪري رهيو آهي.
ٽرمپ آمريڪي ٽي وي پروگرام 60 منٽس ۾ انٽرويو دوران چيو ته هن پينٽاگون کي ايٽمي تجربا ٻيهر شروع ڪرڻ جي هدايت ڏني آهي. هن الزام لڳايو ته شمالي ڪوريا، پاڪستان ۽ ٻيا ملڪ تجربا ته ڪري رهيا آهن پر ان جو اعلان نٿا ڪن.
انهن بيانن کانپوءِ عالمي سطح تي خدشن جنم ورتو آهي ته آمريڪا 1992 کانپوءِ پهريون ڀيرو نئون ايٽمي تجربو ڪرڻ جو ارادو رکي ٿو.
ٽرمپ چيو ته آمريڪا وٽ اهڙو وڏو ايٽمي ذخيرو آهي، جيڪو “دنيا کي 150 ڀيرا تباهه ڪري سگهي ٿو”، پر ان جي باوجود تجربا ضروري آهن ته جيئن “انهن هٿيارن جي ڪارڪردگي کي پرکجي”.
هن وڌيڪ چيو ته روس ۽ چين خاموشي سان تجربا ڪري رهيا آهن، ۽ آمريڪا واحد ملڪ آهي جيڪو نه ٿو ڪري. مان نٿو چاهيان ته آمريڪا اڪيلو ملڪ رهي جيڪو تجربا نه ڪري.
ٽرمپ زور ڏنو ته آمريڪا شفافيت سان ڪم ڪري ٿو. اسان کليل معاشرو آهيون، سڀ ڪجهه عوام آڏو رکون ٿا. جيڪڏهن ٻيا تجربا ڪري رهيا آهن ته اسان کي به ڪرڻا پوندا.
پاڪستان جي پرڏيهي وزارت طرفان هن وقت تائين انهن الزامن تي ڪوبه ردعمل ظاهر نه ڪيو ويو آهي.
ماهرن موجب، ٽرمپ جا بيان آمريڪا جي ايٽمي عدم پکيڙ پاليسي تي سوال اٿارين ٿا، ۽ جيڪڏهن آمريڪا تجربا ٻيهر شروع ڪري ٿو ته اهو بين الاقوامي معاهدن ۽ عالمي امن جي ڪوششن لاءِ خطرو بڻجي سگهي ٿو.
