ممبئي: بالي ووڊ جي مشهور اداڪار اڪشي ڪمار جعلي اي آئي وڊيوز ذريعي پنهنجي تصوير، آواز ۽ شخصيت جي غلط استعمال خلاف ممبئي هاءِ ڪورٽ ۾ درخواست داخل ڪري ڇڏي آهي. هي قدم اداڪار اڀيشڪ بچن ۽ ايشوريا راءِ جي عدالتي ڪارروائي کانپوءِ کنيو ويو آهي، جيڪي اڳ ئي اهڙي مواد خلاف تحفظ حاصل ڪري چڪا آهن.
ڀارتي ميڊيا رپورٽن موجب، هڪ جعلي ٽريلر ۾ اڪشي ڪمار کي اتر پرديش جي وزيراعليٰ يوگي آدتيه ناتھ جي ڪردار ۾ ڏيکاريو ويو، جيڪو وڊيو هٽائڻ کان اڳ 20 لک کان وڌيڪ ڀيرا ڏٺو ويو. ٻي جعلي وڊيو ۾ اڪشي کي والمڪي سماج جي پيشوا مهارشي والمڪي بابت متنازع تبصرا ڪندي ڏيکاريو ويو، جنهن سبب ڪيترن ئي علائقن ۾ احتجاج شروع ٿي ويا.
اداڪار جي وڪيل عدالت ۾ موقف اختيار ڪيو ته AI پليٽفارمز تي ’AI Akshay Kumar V2 Voice‘ نالي ٽول پيش ڪيو ويو آهي، جيڪو ڪنهن به ٽيڪسٽ انپٽ کي اداڪار جي اصل لهجي ۾ تقرير ۾ تبديل ڪري سگهي ٿو.
ياد رهي ته ان کان اڳ ايشوريا راءِ، اڀيشڪ بچن، اميتابھ بچن، هريتڪ روشن، ڪرن جوهر ۽ آشا ڀوسلي سميت ڪيترن ئي مشهور شخصيتن به ڊيپ فيڪ ۽ AI مواد ۾ غلط استعمال خلاف عدالتي تحفظ حاصل ڪيو آهي.
