اسلام آباد (ويب ڊيسڪ) ڀارتي ميڊيا ۾ هلندڙ دعويٰ ته پاڪستان بالي ووڊ اداڪار سلمان خان کي دهشتگردن جي فهرست ۾ شامل ڪري ڇڏيو آهي، جاچ کان پوءِ بي بنياد ثابت ٿي. دعويٰ ڪئي وئي ته سلمان خان کي انسدادِ دهشتگردي ايڪٽ (ATA) جي فورتھ شيڊول ۾ شامل ڪيو ويو، پر پاڪستاني ادارن ان نوٽيفڪيشن کي جعلي قرار ڏنو.
هي دعويٰ ان وقت سامهون آئي جڏهن سلمان خان جواءِ فورم 2025 دوران رياض ۾ ڳالهائيندي بلوچستان جو ذڪر ڪيو. ڀارتي ميڊيا ان بيان کي بنياد بڻائي دعويٰ ڪئي ته پاڪستان سندن خلاف قدم کنيو آهي.
نوٽيفڪيشن جي تاريخ 16 آڪٽوبر درج هئي، جڏهن ته سلمان خان 17 آڪٽوبر تي فورم ۾ شرڪت ڪئي. دستاويز ۾ املا جون غلطيون، فونٽ، الائنمينٽ، ۽ سڃاڻپ نمبر جهڙا ڪيترائي تضاد موجود هئا. ان کان علاوه، دستخط به هڪ اڳ ۾ شيئر ڪيل دستاويز سان ملندڙ هئا، جنهن مان ظاهر ٿيو ته فائيل ڊيجيٽل ايڊيٽنگ ذريعي جعلي تيار ڪئي وئي.
گھرو کاتي بلوچستان ۽ انٽيليجنس ذريعن واضح طور تي ان نوٽيفڪيشن کي ھٿ ٺوڪي ۽ جعلي قرار ڏنو، ۽ چيو ته اهڙو ڪو حڪم نامو جاري نه ٿيو آهي.
سلمان خان جي بيان بابت به وضاحت سامهون آئي ته هن صرف چيو هو:
“هتي بلوچستان، افغانستان ۽ پاڪستان جا ماڻهو ڪم ڪري رهيا آهن، ان ڪري فلمون جلد ڪامياب ٿين ٿيون.”
يعني بيان کي تناظر کان ڪٽي پيش ڪيو ويو ۽ ان تي سياسي رنگ ڏنو ويو.
نتيجي طور، سلمان خان کي دهشتگرد قرار ڏيڻ جو دعويٰ سراسر ڪوڙو آهي، ۽ ڀارتي ميڊيا هڪ جعلي نوٽيفڪيشن جي بنياد تي غلط معلومات پکيڙي.
