ممبئي (ويب ڊيسڪ) بالي ووڊ جي سپر اسٽار سلمان خان هن سال 27 ڊسمبر تي پنهنجي 60هين سالگره ملهائڻ پيا وڃن. شاه رخ خان ۽ عامر خان کان پوءِ هاڻي ٽيون “خان” به سٺ سالن جي عمر ۾ داخل ٿي رهيو آهي، پر حيرت انگيز طور تي هن جي سالگره لاءِ ڪنهن وڏي تقريب يا خاص پروگرام جو اعلان ناهي ٿيو.
سلمان خان پنهنجي سالگره کان اڳ سوشل ميڊيا تي جم ۾ ورتل ڪجهه تصويرون شيئر ڪيون آهن، جن ۾ هو بليڪ بنيان ۽ نيري شرٽس ۾ نظر اچي رهيو آهي. ڪلين شيو انداز ۾ سندس مضبوط جسامت ۽ فٽنس مداحن کي ڏاڍي متاثر ڪيو آهي. هن تصويرن سان گڏ لکيو ته هو اميد ڪري ٿو ته 60 سالن جي عمر ۾ به اهڙو ئي نظر اچي.
مداحن جو ردعمل انتهائي دلچسپ رهيو. ڪيترن ئي صارفين چيو ته سلمان خان پنهنجي عمر کان گهڻو گهٽ لڳي ٿو، هڪ مداح لکيو ته هو 30 سالن جي نوجوان جهڙو نظر اچي ٿو، جڏهن ته ٻئي چيو: “سلمان خان اڃا به سڀني تي ڀاري آهي.”
واضح رهي ته شاه رخ خان ۽ عامر خان جي ساٺين سالگره تي سندن فلمون ٻيهر نمائش لاءِ پيش ڪيون ويون، پر سلمان خان لاءِ اهڙي ڪنهن تقريب جو اعلان ناهي ٿيو. ان جي باوجود سندس فٽنس ۽ مقبوليت هڪ ڀيرو ٻيهر ميڊيا ۽ مداحن جي توجهه جو مرڪز بڻجي وئي آهي.
