اسلام آباد (ويب ڊيسڪ) پاڪستان تحريڪ انصاف (پي ٽي آءِ) جي وفد امير جمعيت علماءِ اسلام (ف) مولانا فضل الرحمان سان سندس اسلام آباد واري رهائشگاهه تي ملاقات ڪئي، جتي موجوده سياسي صورتحال ۽ خطي جي امن بابت اهم ڳالهيون ٿيون.
پي ٽي آءِ جي وفد ۾ اڳوڻو اسپيڪر اسد قيصر، صوبائي صدر جنيد اڪبر ۽ شهرا م ترڪئي شامل هئا، جڏهن ته جي يو آءِ طرفان مولانا صلاح الدين ايوبي، جلال الدين ايڊووڪيٽ ۽ مولانا اسجد محمود شرڪت ڪئي. مولانا فضل الرحمان طرفان پي ٽي آءِ وفد جي اعزاز ۾ عشائيه پڻ ڏنو ويو.
ملاقات دوران خيبر پختونخوا ۾ امن امان جي صورتحال تي ڳالهه ٻولهه ٿي، جتي پي ٽي آءِ طرفان قومي جرڳي جي تجويز پيش ڪئي وئي، جنهن کي مولانا فضل الرحمان خوش آمديد چيو.
پي ٽي آءِ وفد طرفان پارليامينٽ ۾ اپوزيشن کي متحد ڪرڻ لاءِ مولانا فضل الرحمان کان تعاون جي اپيل ڪئي وئي، جنهن دوران محمود خان اچڪزئي کي اپوزيشن ليڊر طور نامزد ڪرڻ تي اتفاق ڪيو ويو.
ان سان گڏ، پي ٽي آءِ وفد خيبر پختونخوا اسيمبلي مان سينيٽ جي خالي نشست تي جي يو آءِ کان تعاون جي درخواست پڻ ڪئي. ملاقات کي سياسي حلقن ۾ اهم اڳڀرائي طور ڏٺو پيو وڃي.
