ڪراچي (ويب ڊيسڪ) آمريڪي فيڊرل ريزرو پاران شرح سود ۾ 25 بيسز پوائنٽس جي گهٽتائي کانپوءِ عالمي سطح تي سون جي طلب ۾ واڌ ڏسڻ ۾ آئي آهي، جنهن سبب سون جي اگهه ۾ ٻيهر تيزي جو رجحان غالب اچي ويو آهي.
بين الاقوامي بلين مارڪيٽ ۾ في اونس سون جي قيمت هڪ ئي ڏينهن ۾ 53 ڊالر جي واڌ سان 4,018 ڊالر جي سطح تي پهچي وئي.
عالمي مارڪيٽ ۾ واڌ جي اثر هيٺ، مقامي صرافه مارڪيٽن ۾ به جمعي جي ڏينهن 24 قيراط في توله سون جي قيمت 5,300 رپيا واڌ سان 4,24,162 رپيا ٿي وئي.
ان سان گڏ، في 10 گرام سون جي قيمت به 4,544 رپيا واڌ سان 3,63,650 رپيا جي سطح تي پهچي وئي.
ساڳئي وقت، في توله چاندي جي قيمت 158 رپيا واڌ سان 5,192 رپيا ٿي وئي، جڏهن ته 10 گرام چاندي جي قيمت 136 رپيا واڌ سان 4,451 رپيا تي پهتي.
ماهرن جو چوڻ آهي ته عالمي اقتصادي غير يقيني صورتحال، ڊالر جي قدر ۾ گهٽتائي، ۽ سيڙپڪارن جي محفوظ سرمايه ڪاري جي تلاش سون جي قيمتن ۾ واڌ جو اهم سبب بڻجي رهيا آهن.
