اسلام آباد (ويب ڊيسڪ) ڊڪي ڀائي کان رشوت وٺڻ جي الزام هيٺ گرفتار اين سي سي آءِ اي جي 6 آفيسرن کان 4 ڪروڙ 25 لک 48 هزار رپيا وصول ڪيا ويا، جڏهن ته جوابدارن خلاف آمدني کان وڌيڪ اثاثن جي جاچ پڻ شروع ڪئي وئي آهي.
ايف آءِ اي جي جاچ رپورٽ موجب، جوابدار علي رضا کان 70 لک، زوار کان 9 لک، ياسر گجر کان 19 لک، اسسٽنٽ ڊائريڪٽر شعيب رياض کان 36 لک 48 هزار، ۽ ايڊيشنل ڊائريڪٽر چوڌري سرفراز کان 1 ڪروڙ 25 لک 48 هزار رپيا وصول ڪيا ويا.
رشوت جي الزام ۾ گرفتار آفيسرن کي لاهور جي ضلعي ڪچهري عدالت ۾ پيش ڪيو ويو، جتي 3 ڏينهن جو جسماني ريمانڊ مڪمل ٿيڻ بعد جوابدارن کي هٿڪڙيون هڻي آندو ويو. ٻڌڻي جوڊيشل مجسٽريٽ ڪئي، جڏهن ته جوابدار جي وڪيل طور رانا معروف ۽ فاروق باجوه عدالت ۾ پيش ٿيا.
وڪيل منير ڀٽي عدالت کي آگاهه ڪيو ته شعيب رياض ڊڪي ڀائي جا 3 لک 420 ڊالر بائنانس اڪائونٽ ۾ منتقل ڪيا پر انهن وٽ ڪنهن به ٽرانزيڪشن جو ثبوت موجود ناهي. هن چيو ته سوشل ميڊيا تي ڪيس جي هائيپ پيدا ڪئي وئي آهي، جنهن سبب فيئر ٽرائل ممڪن ناهي.
ايف آءِ اي طرفان عدالت ۾ پيش ڪيل رپورٽ ۾ ڄاڻايو ويو ته جوابدارن کان حاصل ڪيل رقم جي تفصيل سان گڏ انهن جي اثاثن جي جاچ پڻ جاري آهي. جاچ آفيسر جو چوڻ هو ته جوابدارن تربيت يافته آهن، ان ڪري انهن کان جاچ ڪرڻ ڏکيو آهي، ۽ انهن جي گذريل ڪيسن جي تفصيل گڏ ڪئي پئي وڃي. عدالت وڪيلن ۽ جاچ آفيسر جي دليلن کانپوءِ فيصلو محفوظ ڪري ڇڏيو.
