لاهور(ويب ڊيسڪ) ضلعي ڪچهري لاهور ۾ جوا ايپس جي غيرقانوني پروموشن واري ڪيس ۾ اهم اڳڀرائي سامهون آئي آهي.
جوڊيشل مجسٽر نعيم وٽو ڪيس جي ٻڌڻي ڪئي، جنهن ۾ يوٽيوبَر سعد الرحمان عرف ڊڪي ڀائي ۽ سندس زال عروب جتوئي عدالت ۾ پيش ٿيا.
عدالت ڊڪي ڀائي جي ساٿي ملزم سبحان جي بريت جي درخواست خارج ڪري ڇڏي. ساڳئي وقت عدالت ڪيس جي ٻڌڻي 17 ڊسمبر تائين ملتوي ڪندي جوابدارن کي فردِ جرم لاءِ ايندڙ تاريخ تي طلب ڪيو.
ڊڪي ڀائي عدالت ۾ ٻڌايو ته سبحان منهنجي گرفتاري کان ٽن مهينن اڳ نوڪري تي آيو هو ۽ هڪ لک رپيا پگهار تي ڪم ڪري رهيو آهي، ان جو ڪيس سان ڪو تعلق ناهي.
عدالت ۾ سوال ڪيو ويو ته عروب جتوئي جي گرفتاري کان اڳ ضمانت ٿي چڪي آهي؟ جنهن تي وڪيل ٻڌايو ته ها، عروب جي ضمانت اڳ ۾ ٿي چڪي آهي.
ڊڪي ڀائي جي وڪيل ٻڌايو ته هن ڪيس ۾ سپرداري جي درخواست ڏني وئي آهي، جنهن تحت اين سي سي آءِ اي وٽ موجود اليڪٽرانڪ ڊيوائيسز، موبائل فون، چار ڪريڊٽ ڪارڊ ۽ رقم واپس ڪرڻ جي گهر ڪئي وئي آهي.
واضح رهي ته ڊڪي ڀائي ٻن ڏينهن اڳ ضمانت تي آزاد ٿيو هو، جڏهن ته اين سي سي آءِ جوابدارن خلاف ڪيس داخل ڪيو آهي.
