اسلام آباد (ويب ڊيسڪ) اسلام آباد هاءِ ڪورٽ باني چيئرمين پي ٽي آءِ عمران خان سان وڪيل سلمان اڪرم راجا جي اڄ ئي ملاقات يقيني بڻائڻ جو حڪم جاري ڪري ڇڏيو.
جسٽس ارباب محمد طاهر جي سربراهيءَ ۾ ٻڌڻي دوران عمران خان جي ايڪس اڪائونٽ تي مبينا رياست مخالف مواد شيئر ڪرڻ جي بنياد تي پابندي جي درخواست تي غور ڪيو ويو. ٻڌڻي دوران عمران خان جي وڪيل سلمان اڪرم راجا عدالت ۾ پيش ٿيو، جڏهن ته عمران خان جي ڀيڻ عليمه خان به موجود هئي.
جيل انتظاميه عدالت ۾ جواب جمع ڪرايو، جنهن جي ڪاپي ڌرين کي فراهم ڪرڻ جي هدايت ڪئي وئي. وڪيل سلمان راجا عدالت کي آگاهه ڪيو ته 24 مارچ جي حڪم جي باوجود ملاقات نه ٿي سگهي. هن چيو ته اڄ ملاقات جو مقرر ڏينهن آهي ۽ کيس باني سان ملي هدايت وٺڻي آهي.
عدالت پڇا ڪئي ته جن اختيارين کي اچڻو هو، اهي ڪٿي آهن؟ وڪيل ٻڌايو ته ملاقات بابت لارجر بينچ جو حڪم اڃا مليو ناهي. جسٽس ارباب محمد طاهر چيو ته مون صحي ڪري ڇڏيا آهن، اهو حڪم وٺي وڃو.
سلمان راجا چيو ته اڳ به ڪيترن ئي حڪمن جون ڪاپيون وٺي ويا آهيون، پر عمل نه ٿيو. عدالت هدايت ڪئي ته عمران خان سان ملاقات اڄ ئي يقيني بڻائي وڃي، ڊپٽي اٽارني جنرل ۽ اسٽيٽ ڪائونسل فون ذريعي جيل اختيارين کي آگاهه ڪن.
سماعت دوران جيل اختيارين طرفان عمران خان جي ايڪس اڪائونٽ تي پابندي بابت رپورٽ پيش ڪئي وئي، جڏهن ته سائبر ڪرائم انويسٽيگيشن ايجنسي جواب جمع ڪرائڻ لاءِ وقت گهريو. وڪيل سلمان راجا چيو ته باني پي ٽي آءِ تائين رسائي نه هجڻ سبب هو جواب نه ڏئي سگهيو.
عدالت سلمان اڪرم راجا جي ملاقات جو حڪم ڏيندي ڪيس جي ٻڌڻي ملتوي ڪري ڇڏي.
