اسلام آباد (ويب ڊيسڪ) وفاقي وزير دفاع خواجه آصف تصديق ڪئي آهي ته پاڪستان ۽ افغانستان جي وچ ۾ استنبول ۾ ٿيندڙ امن ڳالهين جو عمل ناڪام ٿي ويو آهي، جڏهن ته طالبان جي غيرلچڪدار روئي سبب ثالث ملڪ به مايوس ٿي واپس هٽي ويا آهن.
خانگي ٽي وي جي رپورٽ موجب، استنبول ۾ جاري ڳالهين جو سلسلو ختم ٿي چڪو آهي ۽ پاڪستاني وفد وطن واپس روانو ٿي ويو آهي. خواجه آصف جو چوڻ هو ته هاڻ ڳالهين جي ايندڙ مرحلي جو امڪان به ختم ٿي ويو آهي، ڇو ته ثالثي ڪندڙ ملڪن – ترڪيه ۽ قطر – به طالبان جي سخت موقف سبب پنهنجا هٿ کڻي ڇڏيا آهن.
هن چيو ته پاڪستاني وفد خالي هٿ واپس آيو، جيڪو ان ڳالهه جو واضح ثبوت آهي ته ثالثن کي به هاڻ افغان قيادت مان ڪا اميد نه رهي آهي. خواجه آصف ترڪيه ۽ قطر جي خلوص نيت سان ثالثي جي ڪردار تي شڪريو ادا ڪندي چيو ته ٻنهي ملڪن پاڪستان جي موقف جي حمايت ڪئي، پر افغان وفد صرف زباني يقين ڏيارڻ تي زور ڏيندو رهيو، جڏهن ته پاڪستان لکت معاهدي تي زور ڏنو، جنهن کي طالبان مڃڻ کان انڪار ڪيو.
وزير دفاع جو چوڻ هو ته جيڪڏهن ثالثن طرفان ٿوري به اميد ظاهر ڪئي وڃي ها ته پاڪستان ڳالهين جاري رکي ها، پر هاڻ نه صرف ڳالهين جو عمل ختم ٿي چڪو آهي، پر ثالث به مايوس ٿي پوئتي هٽي ويا آهن.
خواجه آصف واضح ڪيو ته جيڪڏهن افغان سرزمين تان پاڪستان خلاف ڪا به ڪارروائي ڪئي وئي ته ان جو سخت ۽ مؤثر جواب ڏنو ويندو، البت جيستائين افغانستان طرفان جنگبندي برقرار آهي، پاڪستان به امن جي پاليسي تي قائم رهندو.
واضح رهي ته گذريل ڏينهن استنبول ۾ پاڪ افغان ڳالهين جو ٽيون مرحلو شروع ٿيو هو، جيڪو ڪنهن نتيجي تي پهچڻ کانسواءِ ڊيڊ لاڪ جو شڪار ٿي ختم ٿي ويو.
