ڪراچي (ويب ڊيسڪ) بيٽنگ ايپس جي پروموشن سبب قانوني ڪارروائين کي منهن ڏيندڙ مشهور يوٽيوب شخصيت ڊڪي ڀاءُ جي ڀاءُ، ضياءَ ذوالفقار، هڪ جذباتي وڊيو پيغام جاري ڪندي اپيل ڪئي آهي ته عروب کي هن معاملي ۾ بيجا طور تي نه ڇڪيو وڃي، ڇو ته سندس ڀاڀي ۽ والده اڳ ئي شديد ذهني اذيت مان گذري رهيون آهن.
ضياءَ ذوالفقار ٻڌايو ته سوشل ميڊيا تي غلط خبرون ڦهلائي ويون ته سعد کي ست سال قيد ۽ ڊيڍ ڪروڙ رپين جو ڏنڊ ٿيڻ وارو آهي، جڏهن ته حقيقت ان کان مختلف آهي. هن چيو ته جڏهن هو سعد سان جيل ۾ ملڻ ويو ته هو ٻه ڏينهن لڳاتار روئي رهيو هو ۽ حيران هو ته معاملو ايترو وڏو ڪيئن بڻجي ويو. سعد کي گرفتار ٿئي ٽي مهينا ٿي چڪا آهن، جن مان 22 ڏينهن جسماني رمانڊ تي رهيو، باقي وقت جيل ۾ گذري رهيو آهي.
هن وڌيڪ چيو ته هي ڪيس نه رڳو سعد پر سڄي خاندان، خاص طور تي عورتن تي گهرو اثر ڇڏيو آهي. رپورٽرن ۽ سوشل ميڊيا پيجز طرفان سچ ۽ ڪوڙ ملي جلي خبرون هلائي ويون، جن سان خاندان جي تڪليف وڌي.
ضياءَ واضح ڪيو ته اين سي سي آئي اي خلاف قانوني ڪارروائي ذاتي مفاد لاءِ نه پر انهن سڀني لاءِ آهي، جيڪي بليڪ ميلنگ جو شڪار ٿيا آهن. جيل ۾ ملاقات دوران هن ٻڌايو ته ڪيترائي قيدي به اهڙي بليڪ ميلنگ جو شڪار آهن.
هن چيو ته جيل مان واپسي تي هو، سندس والده ۽ عروب اهو سوچيندا رهيا ته هو خوش نصيب آهن، جو وڪيلن جي فيس ۽ سفر جا خرچ برداشت ڪري سگهن ٿا، جڏهن ته ڪيترائي قيدي مالي طور ڪمزور هجڻ سبب قانوني مدد حاصل نٿا ڪري سگهن.
ضياءَ وضاحت ڪئي ته اين سي سي آئي اي ادارو پاڻ ڪرپٽ ناهي، پر ڪجهه اهلڪار اختياري غلط استعمال ڪري رهيا هئا. هن چيو ته ايف آئي اي اينٽي ڪرپشن سيل هن معاملي ۾ مڪمل سهڪار ڪيو ۽ ساڻس گڏ بيٺو.
آخر ۾ ضياءَ عوام کي صلاح ڏني ته جيڪڏهن ڪو سرڪاري آفيسر بليڪ ميل ڪري ته ثبوتن سان ايف آئي اي اينٽي ڪرپشن سرڪل سان رابطو ڪن، ڇو ته ادارو مدد لاءِ تيار آهي. هن چيو ته ايف آئي اي جي سهڪار سان نظام تي اعتماد ٻيهر بحال ٿيو آهي.
