اسلام آباد(ويب ڊيسڪ) وفاقي آئيني عدالت جي چيف جسٽس امين الدين خان ٻڌڻي دوران باني پي ٽي آءِ عمران خان جي وڪيل سان مڪالمو ڪندي چيو ته ملاقات لاءِ هدايت ڏيڻ عدالت جو ڪم ناهي، جنهن فورم سزا ڏني آهي، ساڳئي فورم سان رجوع ڪيو وڃي.
اسلام آباد هاءِ ڪورٽ ججز ٽرانسفر ڪيس ۾ آئيني عدالت اسلام آباد هاءِ ڪورٽ جي پنج ججز جي انٽرا ڪورٽ اپيل عدم پيـروي تي خارج ڪري ڇڏي. ساڳي طرح ڪراچي بار جي اپيل به خارج ڪئي وئي، جڏهن ته لاهور هاءِ ڪورٽ بار ۽ لاهور هاءِ ڪورٽ بار ايسوسيئيشن جي وڪيلن کي وقت فراهم ڪندي ٻڌڻي اڻڄاتل مدي تائين ملتوي ڪئي وئي.
جسٽس امين الدين خان جي سربراهي ۾ ڇهه رڪني بئنچ ٻڌڻي ڪئي، جنهن ۾ جسٽس حسن اظهر رضوي، جسٽس علي باقر نجفي، جسٽس ڪي ڪي آغا، جسٽس روزي خان ۽ جسٽس ارشد حسين شاهه شامل هئا.
ٻڌڻي دوران باني پي ٽي آءِ جو وڪيل ادريس اشرف عدالت ۾ پيش ٿيو ۽ موقف اختيار ڪيو ته سندس موڪل اڊياله جيل ۾ قيد آهي، هدايتون وٺڻ لاءِ وقت درڪار آهي. عدالت کيس وقت فراهم ڪندي سماعت ملتوي ڪري ڇڏي.
ادريس اشرف آرٽيڪل 187 تحت مڪمل انصاف جي فراهمي لاءِ عدالت کي استدعا ڪئي، جنهن تي چيف جسٽس امين الدين خان چيو ته هدايت ڏيڻ اسان جو ڪم ناهي، جنهن عدالت سزا ڏني آهي، ساڳئي عدالت سان رابطو ڪيو وڃي.
