ڪراچي(ويب ڊيسڪ) سنڌ هاءِ ڪورٽ ڪراچي ۾ لاڳو ڪيل اي-چالان سسٽم خلاف سياسي جماعتن، ٽرانسپورٽ مالڪن ۽ شهرين جي درخواستن تي فوري حڪمِ امتناع جاري ڪرڻ جي استدعا رد ڪري ڇڏي. عدالت ڊي آءِ جي ٽريفڪ پير محمد شاهه ۽ ٻين عملدارن کان جواب طلب ڪندي ٻڌڻي 11 ڊسمبر تائين ملتوي ڪري ڇڏي.
ٻڌڻي دوران درخواستگذار جي وڪيل موقف اختيار ڪيو ته ڪراچي ۾ ٽريفڪ خلاف ورزين تي ڏنڊ لاهور جي ڀيٽ ۾ گهڻو وڌيڪ آهي، جنهن سان شهرين سان امتيازي سلوڪ ٿي رهيو آهي. عدالت هن موقف کي رد ڪندي چيو ته مختلف شهرن جا حالتون ۽ ضرورتون الڳ هونديون آهن، تنهنڪري سادو مقابلو مناسب ناهي.
وڪيل وڌيڪ چيو ته بس مالڪن کي مسافر ويهارڻ جي اجازت به نٿي ڏني وڃي، جنهن تي عدالت ريمارڪس ڏنا ته بسون اسٽينڊ تي ئي روڪيون وڃن. وڪيل جواب ڏنو ته شهر ۾ مناسب بس اسٽينڊ موجود ئي ناهن، جنهن تي عدالت چيو ته هو شهرين جي مسئلن کان واقف آهن ۽ سڀني ڌرين جا جواب اچڻ کان پوءِ ڪيس گڏجي ٻڌو ويندو.
درخواستن ۾ سنڌ جو چيف سيڪريٽري، صوبائي حڪومت، آءِ جي سنڌ، ڊي آءِ جي ٽريفڪ پوليس، نادرا، ايڪسائيز ۽ ٻين ادارن کي ڌر بڻايو ويو آهي. شهرين ۽ سياسي جماعتن جو موقف آهي ته ڳرا ڏنڊ صرف آمدني وڌائڻ جو ذريعو بڻجي ويا آهن۔
واضح رهي ته سنڌ حڪومت 27 آڪٽوبر تي ھٿرادو ذهانت سان هلندڙ ٽريفڪ ريگيوليشن اينڊ سائيٽيشن سسٽم (ٽريڪس) جو افتتاح ڪيو هو، جنهن تحت هڪ هفتي ۾ ئي سيٽ بيلٽ، هيئلمٽ ۽ شيشن بابت خلاف ورزين تي لڳ ڀڳ 30 هزار چالان جاري ٿيا، جن جي مجموعي رقم ڪروڙين رپين تائين پهتي.
جيئن ته شهرين ۽ سياسي حلقن اي-چالان تي تنقيد ڪئي آهي، پر ڪجهه حلقن اهو به تسليم ڪيو آهي ته هن نظام کان پوءِ ٽريفڪ سگنلن تي گاڏيون مقرر لائين تي روڪجڻ لڳيون آهن ۽ موٽر سائيڪل سوارن ۾ هيلمٽ جو استعمال به وڌيو آهي۔
