راولپنڊي: راولپنڊي ۾ باني پي ٽي آءِ عمران خان سان ملاقات نه ٿيڻ تي سندس ڀينرن اڊياله روڊ تي ڌرڻو ھڻي ڇڏيو، جنهن ۾ وڏي انگ ۾ ڪارڪن گڏ ٿي ويا ۽ ڇتي نعريبازي ڪئي وئي۔
اڄ عمران خان ۽ بشريٰ بي بي سان ملاقات جو ڏينهن هو، جنهن لاءِ پي ٽي آءِ ڪارڪن اڊياله جيل طرف روانا ٿيا۔ عليمه خان ٻين ڀينرن سان گڏ گورکپور ناڪي تي پهتي، جتي ڪارڪنن استقبال ڪيو ۽ نعريبازي ڪئي۔ پوليس وڏي نفري سان موجود رهي ۽ ڪارڪنن کي اڳتي وڃڻ کان روڪيو، جنهن سبب وڌيڪ ڪارڪن گڏ ٿي ويا۔
عليمه خان ۽ سندس ڀينر گاڏي ۾ موجود هيون، جڏهن ته ڪارڪنن جو جلوس پيدل گاڏي سان گڏ اڊياله جيل طرف وڌيو۔ فيڪٽري ناڪي تي ڪارڪن ۽ پوليس آمهون سامهون اچي ويا، پوليس مظاهرين کي روڊ جي پاسي واري پلاٽ ۾ منتقل ٿيڻ جي هدايت ڪئي، پر ڪارڪنن ڇتي نعريبازي جاري رکي۔
ڌرڻي سبب فيڪٽري ناڪي کان اڊياله روڊ مڪمل بند ٿي ويو، جنهن ڪري اسڪول ۽ ڪاليج جا شاگرد ۽ مسافر وڏي تڪليف ۾ ڦاسي پيا۔ ملاقات جو وقت اچي ويو پر عمران خان جي ڀينرن سميت ڪنهن به اڳواڻ کي ملاقات جي اجازت نه ملي، بئريسٽر گوهر علي خان کي به اجازت نه ڏني وئي۔
عليمه خان، ڊاڪٽر عظميٰ ۽ نورين خان جو ڌرڻو فيڪٽري ناڪي تي جاري رهيو۔ بعد ۾ پوليس اڊياله روڊ جي ٻي طرف کان ٽريفڪ بحال ڪئي، جنهن سان شهرين جي پريشاني ختم ٿي وئي۔
