اسلام آباد(ويب ڊيسڪ) باني پي ٽي آءِ جي ڀيڻ عليمه خان اسلام آباد هاءِ ڪورٽ ۾ ميڊيا سان ڳالهائيندي چيو ته عمران خان بابت “فاتحه پڙهڻ” واري ڳالهه ڪندڙن کي شرم نه ٿي اچي؟ هن خبردار ڪيو ته جيڪڏهن عمران خان کي ڪجهه به ٿيو ته عوام جو ردعمل ڏسڻو پوندو۔
عليمه خان جو چوڻ هو ته بدمزگي اسان نه پر پوليس اهلڪار پيدا ڪئي، اسان پوليس کي چيو ته توهان به اسان جا ٻار آهيو، اسان ڪنهن به قسم جي بدنظمي نٿا چاهيون۔ هن دعويٰ ڪئي ته ملڪ جي پوليس، بيوروڪريسي ۽ ادارن اندر ماڻهو دل سان اسان سان گڏ آهن۔
هن وڌيڪ چيو ته نوجوانن جي ڪاوڙ ڏسي مون کي ڊپ لڳي ٿو، پاڪستان کي اهڙي طرف نه ڌڪيو جتي عوام جي ڪاوڙ ڪنٽرول کان ٻاهر ٿي وڃي۔ جيڪڏهن چور ۽ ڌاڙيل کي مٿي ويهاريو ويندو ته انتشار پيدا ٿيندو، ۽ حڪمران پاڻ انتشار چاهين ٿا۔
عليمه خان چيو ته عدالت ۾ به صورتحال غيرمعمولي رهي، چيف جسٽس سرفراز ڊوگر جي عدالت صرف 15 منٽ هلي، جڏهن ته پوليس ٽن رڪني بينچ جي حڪم تي عمل نه پئي ڪري، جيڪو توهين عدالت آهي۔ هن چيو ته جيڪڏهن عمران خان کي ڪجهه ٿيو ته عوام اندرون ۽ بيرون ملڪ سخت ردعمل ڏيندو۔
