راولپنڊي(ويب ڊيسڪ) اڊياله جيل ۾ باني پاڪستان تحريڪ انصاف عمران خان سان سندس ڀيڻ ڊاڪٽر عظميٰ خان جي 29 ڏينهن بعد ملاقات ٿي، جنهن ۾ هن چيو ته عمران خان جي صحت ٺيڪ آهي ۽ هو مڪمل طور تي صحتياب آهن۔
ملاقات لاءِ ڊاڪٽر عظميٰ خان اڪيلي طور جيل پهتي، جتي انتظاميه طرفان سخت سيڪيورٽي انتظامات ڪيا ويا۔ سپرنٽنڊنٽ جيل جي هدايت موجب صرف هڪ شخص کي ملاقات جي اجازت ڏني وئي۔ ملاقات لڳ ڀڳ 45 منٽ جاري رهي، جنهن دوران عمران خان پنهنجي ڀيڻ کي ٻڌايو ته کيس سڄو ڏينهن ڪمري ۾ بند رکيو وڃي ٿو ۽ ملاقات يا ڳالهائڻ جي اجازت نٿي ڏني وڃي، جنهن کي هن ذهني ٽارچر قرار ڏنو۔
ملاقات جي وقت جيل جي ٻاهران پي ٽي آءِ جي عورتن ۽ ڪارڪنن جي وڏي تعداد موجود هئي، جن ملاقات جي اجازت ملڻ تي سخت نعريبازي ڪئي۔ ضلعي انتظاميه طرفان راولپنڊي ۾ 3 ڏينهن لاءِ قلم 144 لاڳو ڪيو ويو آهي، جنهن تحت سياسي ۽ مذهبي اجتماع تي پابندي لڳائي وئي۔
اڊياله جيل ۽ ان جي ڀرپاسي ۾ سيڪيورٽي هاءِ الرٽ ڪئي وئي، جيل روڊ تي تعليمي ادارا ۽ دڪان بند ڪرايا ويا، جڏهن ته پنج کان وڌيڪ اضافي ناڪا قائم ڪيا ويا۔ سيڪيورٽي لاءِ 700 کان وڌيڪ پوليس اهلڪار ۽ آفيسر مقرر ڪيا ويا، جن ۾ 12 ٿاڻن جا ايس ايچ اوز ۽ عورت پوليس اهلڪار شامل هئا۔ اهلڪار اينٽي رائٽ سامان سان ليس هئا ۽ گاڏين کي سخت چيڪنگ کان پوءِ اڳتي وڃڻ جي اجازت ڏني وئي۔
پي ٽي آءِ طرفان جيل انتظاميه کي 6 وڪيلن جي فهرست به موڪلي وئي، جنهن ۾ چيئرمين پي ٽي آءِ بيرسٽر گوهر خان، سلمان اڪرم راجا، بيرسٽر سلمان صفدر، علي زمان، سردار نبي ۽ طلعت محمود جا نالا شامل هئا، پر انهن کي ملاقات جي اجازت نه ملي۔
ڊاڪٽر عظميٰ خان ملاقات کان پوءِ ميڊيا سان ڳالهائيندي چيو ته عمران خان جي صحت ٺيڪ آهي، پر هو سخت ڪاوڙ ۾ هو ۽ انتظاميه تي الزام لڳايو ته کين ذهني طور اذيت ڏني پئي وڃي۔
ضلعي انتظاميه موجب امن و امان کي يقيني بڻائڻ لاءِ اڊياله جيل جي سيڪيورٽي لاءِ خاص پلان تي عمل ڪيو پيو وڃي، ۽ قلم 144 جي ڀڃڪڙي تي سخت قانوني ڪارروائي ڪئي ويندي۔
