اسلام آباد (ويب ڊيسڪ) فاقي وزير قانون اعظم نذير تارڙ چيو آهي ته پاڪستان تحريڪ انصاف جي باني عمران خان جيل رولز جي مطابق سياسي ڳالهه ٻولهه نٿو ڪري سگهي، ڇو ته قاعدن ۾ واضح طور لکيل آهي ته ملاقات دوران ٿيل ڳالهه ٻولهه کي پبلڪ نٿو ڪري سگهجي. اسلام آباد ۾ وفاقي وزير اطلاعات عطاالله تارڙ سان گڏ پريس ڪانفرنس ڪندي هن چيو ته عمران خان جي جيل ملاقاتن بابت ڪيترائي غلط تاثر ڏنا پيا وڃن.
اعظم نذير تارڙ چيو ته اسلام آباد جي نئين جيل اڃا آپريشنل ناهي، جڏهن ته اڊياله جيل پنجاب ۾ آهي ۽ ملاقاتون جيل مينيوئل تحت ٿين ٿيون. رول 265 موجب قيدي هفتي ۾ هڪ ملاقات ڪري سگهي ٿو، ملاقات ڪندڙن جو انگ ڇهه هوندو ۽ قيدي هفتي ۾ هڪ چٺي لکي سگهي ٿو، پر سياسي ڳالهه ٻولهه جي اجازت ناهي.
هن چيو ته عمران خان سزا وارو قيدي آهن، ۽ اهڙي قيدي کي بنا نگراني ملاقات جي اجازت نٿي ملي. رول 557 تحت سپرنٽنڊنٽ کي اختيار آهي ته جيڪڏهن ملاقات امن و امان لاءِ خطرو هجي ته ملاقات روڪي سگهي ٿو. هن چيو ته اهي قانون نوان ناهن، ڏهاڪن کان موجود آهن، هڪ دور ۾ انهن رولز کي معطل ڪيو ويو هو، جڏهن نواز شريف جيل ۾ هئا ته اڊياله ۾ ملاقات جي اجازت هئي پر ڪوٽ لکپت ۾ نه هئي.
وفاقي وزير چيو ته عمران خان پاڻ وزيراعظم هئڻ دوران چيو هو ته سزا واري قيدي کي اهڙي سهولت نٿي ملي سگهي، ۽ سپريم ڪورٽ به ان بابت فيصلو ڏئي چڪي آهي. هن چيو ته نواز شريف ۽ مريم نواز هڪ ئي جيل ۾ هوندي به نٿا ملي سگهيا، وڪيلن کي به هفتي ۾ هڪ ملاقات ملي ٿي ۽ ان لاءِ انڊرٽيڪنگ ڏني ويندي آهي.
هڪ سوال جي جواب ۾ هن چيو ته جيڪڏهن ڪنهن به جيل ٽوڙڻ جي ڪوشش ڪئي يا اهڙو ارادو ظاهر ڪيو ته رياست پنهنجو ردعمل ڏيکاريندي.
وفاقي وزير اطلاعات عطاالله تارڙ چيو ته عمران خان 190 ملين پائونڊ ميگا ڪرپشن ڪيس ۾ سزا وارو قيدي آهن ۽ جيل ۾ اضافي سهولتون حاصل آهن، جيڪي ڪنهن ٻئي قيدي کي ڪڏهن نه مليون. هن چيو ته پي ٽي آءِ جي هڪ عورت اڳواڻ عالمي ميڊيا تي غلط دعوائون ڪري رهي آهي ته عمران خان جي جان کي خطرو آهي.
عطاالله تارڙ چيو ته عمران خان جون ٽيئي ڀينرون 9 مئي تي ڪور ڪمانڊر هائوس ٻاهران موجود هيون، ۽ ملاقاتن کان پوءِ سياسي ڳالهه ٻولهه ڪرڻ سبب عظميٰ خان جي ملاقات تي پابندي لڳائي وئي آهي. هن خبردار ڪيو ته جيل رولز جي خلاف ورزي ڪندڙن جي ملاقاتون بند ڪيون وينديون ۽ اڊياله ٻاهران امن و امان خراب ڪرڻ جي ڪوشش تي سخت ڪارروائي ڪئي ويندي.
هن چيو ته اندر کان پيغام موڪليا وڃن ٿا ته فوج ۽ آرمي چيف خلاف ٽوئيٽ ڪيو وڃي، جڏهن ته پي ٽي آءِ دور ۾ عورتن کي به گرفتار ڪيو ويو. اطلاعات واري وزير چيو ته ملاقاتن جو مقصد قانوني مشاورت هوندو آهي، نه ته رياست کي ڪمزور ڪرڻ جون ڳالهيون ڪيون وڃن.
عطاالله تارڙ چيو ته ملڪ جو دفاع مضبوط آهي، معيشت بهتر ٿي آهي، ۽ ڪنهن به صورت ۾ ذاتي مفادن لاءِ ملڪ جي مفادن کي قربان ڪرڻ جي اجازت نه ڏني ويندي. هن چيو ته عمران خان سڀ کان وڌيڪ مراعات يافته قيدي آهن، ۽ قانون جي خلاف ورزي ڪندڙ ڪنهن به شخص جي ملاقات بند ڪئي ويندي.
پريس ڪانفرنس جي آخر ۾ هن چيو ته خيبرپختونخوا جي وزيراعليٰ جو اين ايف سي اجلاس ۾ شرڪت ڪرڻ سٺو قدم آهي ۽ وفاق صوبن سان گڏجي ڪم ڪرڻ لاءِ تيار آهي.
